Avstriyada diplomatning o‘g‘li Rossiyaga josuslik qilishda ayblanib qo‘lga olindi
Avstriya poytaxti Venada kelib chiqishi rossiyalik bo‘lgan Gretsiya fuqarosi qo‘lga olindi. Bu haqda Deutsche Welle xabar berdi.
Mahalliy matbuotning yozishicha, uning otasi Rossiya Bosh shtabining sobiq xodimi bo‘lib, avval Germaniya va Avstriyada diplomat bo‘lib ishlagan. Hibsga olingan shaxs Rossiya foydasiga josuslikda gumon qilinmoqda. Buning uchun unga besh yilgacha qamoq jazosi berilishi mumkin.
Gumonlanuvchi Rossiya rasmiylariga Avstriyadagi umumiy ijtimoiy vaziyat, tashqi siyosat va mamlakatdagi xavfsizlik holati haqida ma’lumot bergani aytilmoqda. 2018-yildan 2022-yilning boshigacha u Rossiya, Belarus, Turkiya va Gruziyaga 65 ta sayohatni amalga oshirgan. So‘nggi bor Moskvaga Rossiyaning Ukrainaga bostirib kirishi arafasida uchgan.
Avstriyada kichik ijtimoiy nafaqada bo‘lgan gumonlanuvchi qandaydir tarzda Vena, Rossiya va Gretsiyada bir nechta mulkni sotib olgan. 2022-yil mart oyi oxirida Avstriya huquq-tartibot idoralari gumonlanuvchining kvartirasida tintuv o‘tkazgan, natijada tinglash moslamalarini kuzatish qurilmasi, yashirin videokameralar va himoya kiyimi topilgan.
Bundan tashqari, huquq-tartibot idoralari xodimlari 10 millionga yaqin fayl saqlangan bir nechta telefon, noutbuk va planshetlarni musodara qilgan.
Mavzuga doir:
- Shvetsiyada er-xotin Rossiyaga josuslik qilishda ayblanib, hibsga olindi
- Londonda Rossiya foydasiga josuslikda gumonlanayotgan erkak hibsga olindi
- Niderlandiya va Belgiya josuslikda gumon qilingan 38 nafar rossiyalik diplomatlarning mamlakatlar hududidan chiqarib yuborilayotganini xabar qildi
- Shvetsiyada ikki erkak Rossiya foydasiga josuslik qilishda ayblandi
