Qozog‘iston shaxmat federatsiyasi eronlik sportchi Sara Xademning Olmaotada bo‘lib o‘tgan jahon chempionati vaqtida ta’qibga uchragani haqida ma’lumot berdi. Bu haqda Tengrinews xabar berdi.
“Muayyan xavflar mavjud edi. Turnir direktori sifatida hamkasblarni yig‘ib, vaziyatni ko‘rib chiqishimga to‘g‘ri keldi. Noma’lum shaxslardan qo‘ng‘iroqlar bo‘ldi, jumladan, federatsiya xodimlari nomiga ham. Ular ishtirokchining yashash joyi, yo‘nalishi va boshqa ma’lumotlarni bilishga urindi”, – dedi federatsiya birinchi vitse-prezidenti Darmen Sadvakasov.
U vaziyat keskinlashishi mumkinligi sababli shaxmatchi xavfsizligini ta’minlash iltimosi bilan Olmaota hokimligiga murojaat qilinganini aytdi. Qizni qo‘riqlash uchun xavfsizlik xodimlari ham bo‘lgan.
“Biz uning mamlakatdan xavfsiz chiqib ketishini ta’minladik: u o‘z vataniga emas, balki Ispaniyaga uchib ketdi va hozirda qaytishni rejalashtirmayapti”, — dedi shaxmat federatsiyasi vitse-prezidenti.
Xadem Olmaota shahrida bo‘lib o‘tgan tezkor shaxmat va blits bo‘yicha jahon chempionatida hijobsiz qatnashgan. Bu Eronning ayollar dress-kodi bo‘yicha qonunlariga ziddir. Holat yuzasidan Eron shaxmat federatsiyasi qizdan yuz o‘girganini ta’kidlagan.
Izoh (0)