Shvetsiyada er-xotin Rossiyaga josuslik qilishda ayblanib, hibsga olindi
Shvetsiyada 2013-yildan beri Rossiya foydasiga josuslik qilganlikda gumonlanib ikki kishi hibsga olindi. Bu haqda mahalliy Dagens Nyheter nashri xabar berdi.
Hibsga olinganlardan biri “Shvetsiyaga va xorijiy davlatga qarshi razvedka faoliyatida”, ikkinchisi esa unga yordam berishda gumon qilinmoqda. Shvetsiya Davlat xavfsizlik xizmati gumonlanuvchilar haqidagi ma’lumotlarni oshkor qilishdan bosh tortdi. Uzoq vaqtdan beri dastlabki tergov harakatlari olib borilayotgani qo‘shimcha qilindi.
Aftonbladet gazetasining yozishicha, hibsga olinganlar 1990-yillar oxirida Shvetsiyaga ko‘chib kelgan rossiyalik muhojir turmush o‘rtoqlardir. Ular 22-noyabr kuni ertalab Milliy tezkor guruh a’zolari tomonidan hibsga olingan, operatsiya davomida ikkita Blackhawk vertolyotidan foydalanilgan. Er-xotin import-eksport biznesi, jumladan elektron komponentlar va sanoat texnologiyalari bilan shug‘ullangan. Erkak kompaniyadan noqonuniy razvedka faoliyati uchun baza sifatida foydalanganlikda gumon qilinmoqda.
Mavzuga doir:
- Shvetsiyada ikki erkak Rossiya foydasiga josuslik qilishda ayblandi
- Londonda Rossiya foydasiga josuslikda gumonlanayotgan erkak hibsga olindi
- Niderlandiya va Belgiya josuslikda gumon qilingan 38 nafar rossiyalik diplomatlarning mamlakatlar hududidan chiqarib yuborilayotganini xabar qildi
- Germaniyada rossiyalik olim josuslikda ayblanmoqda
