“Daryo” nashri 19-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Putin uzoq davom etadigan urushga tayyorlgarlik ko‘ryaptimi?
Rossiya prezidenti Vladimir Putin Ukrainaga qarshi uzoq muddatli urushga tayyorlanmoqda. Buni isbotlovchi bir nechta omillar bor, dedi NATO bosh kotibi o‘rinbosari Mircha Joane Harbiy qo‘mita majlisi chog‘ida. Joanening qayd etishicha, bunga bir qancha omillar ishora qilmoqda, xususan:
- yaqinda 200 mingdan ortiq rossiyalik harbiy xizmatchilarning safarbar qilinishi;
- mahalliy qurol-yarog‘ ishlab chiqarish hajmining oshirilishi;
- boshqa mamlakatlardan — xususan, Erondan qurol sotib olish sur’atlarining oshirilishi.
Avvalroq Putin Rossiya amalga oshirayotgan ishlar, shu jumladan, “maxsus operatsiya” ham, go‘yoki, urushga nuqta qo‘yishga urinish ekanini aytgandi.
Zelenskiy Si Szinpinni muloqotga taklif qildi
Ukraina prezidenti Vladimir Zelenskiy Xitoy xalq respublikasi raisi Si Szinpinga xat yozdi, deb xabar beradi South China Morning Post. Maktubni uning rafiqasi Yelena Zelenskaya Davosdagi iqtisodiy forum chog‘ida Xitoy vakillariga topshirgan.
Zelenskaya jurnalistlarga ma’lum qilishicha, xat muloqotga taklifdan iboratdir, u Xitoy rahbariyati bu taklifga javob berishiga umid bildirdi. Vladimir Zelenskiy anchadan buyon Si Szinpinni Rossiya prezidenti Vladimir Putinga bosim o‘tkazib, uni urushni to‘xtatishga chaqirishga urinmoqda, deyiladi xabarda.
Xitoy diplomatik darajada Rossiyaga qarshi chiqmayapti — Pekin Ukrainada nizo boshlanishida Vashingtonni aybdor deb atamoqda shuningdek, BMTda Ukrainaga bosqin bilan bog‘liq masalalar bo‘yicha ovoz berishda betaraf qolmoqda.
Kiyevning Qrimga zarba berish masalasida AQSH o‘z pozitsiyasini yumshatmoqda
Ayni vaziyatda ,AQSH Ukrainani Qrimdagi nishonlarga zarba berish imkoniga ega vositalar bilan ta’minlash masalasi bo‘yicha o‘z pozitsiyasini asta-sekin yumshatmoqda. Bu haqda The New York Times gazetasi yozadi
Yarimorol Rossiya tomonidan anneksiya qilinganidan beri AQSH Qrimni Ukraina hududi deb ta’kidlaydi. Biroq urush boshlanganidan keyin Qo‘shma Shtatlar Kiyevga yarimoroldagi nishonlarga zarba berish vositalarini jo‘natishdan bosh tortdi.
NYT yozishicha, harbiylar va AQSH prezidenti ma’muriyatining amaldorlari shaxsiy suhbatlarda Ukraina Qurolli kuchlarining Qrimga zarba berishi maqsadga muvofiq emasligini ta’kidlab, frontning boshqa qismlaridagi nishonlarga e’tibor qaratish zarur deb hisoblagan.
Endi bo‘lsa munosabat o‘zgargan, deb yozadi NYT. Bayden ma’muriyati agar Ukraina kuchlari Rossiyani Qrim ustidan nazoratni qo‘ldan chiqarish bo‘yicha tashvishga tushira olsa, bu kelajakdagi har qanday muzokaralarda Kiyev pozitsiyasini mustahkamlaydi, degan fikrga kelmoqda.
AQSH rasmiylari va ekspertlari orasida Rossiyaning taktik yadro qurollarini qo‘llashi haqidagi xavotirlar ham pasaygan, ammo ularning fikricha, bunday ssenariy xavfi baribir saqlanib qolmoqda.
Maqolada ta’kidlanishicha, Ukrainani Qrimdagi nishonlarga zarba berishga qodir masofada uchadigan raketalar bilan ta’minlash haqida hali hech qanday gap yo‘q. Ammo Qrim ko‘prigi singari, yarimorolning asosiy ta’minot yo‘llariga hujum qilish uchun HIMARS yoppasiga o‘t ochish tizimlari va Bradley zirhli mashinalaridan foydalanish imkoniyati muhokama qilinmoqda.Ayni vaziyatda Germaniya kansleri Olaf Shols: AQSH Kiyevga Abrams tanklarini jo‘natsagina, Berlin ham Leopard’larni yuborishini ma'lum qildi
O‘zbekistonda onkologik kasalliklarni davolovchi dorilar ishlab chiqariladi
Shavkat Mirziyoyev Singapurga davlat tashrifi doirasida farmatsevtika yo‘nalishi bo‘yicha ikkita kelishuv bitimini imzoladi. Bu haqda sog‘liqni saqlash vaziri Amrillo Inoyatov ma’lumot berdi.Qayd etilishicha, ushbu mamlakatning “Meynxardt Grup” kompaniyasi hamkorligida tashkil etilayotgan Loyihalashtirish va injiniring markazi bilan immunobiologik preparatlar ishlab chiqaruvchi, umumiy qiymati 49 million dollarga teng farmatsevtika korxonasi ochilishi belgilandi.
Unga muvofiq, mamlakatda kasalliklar profilaktikasi va davolash jarayonida qo‘llanadigan quyidagi preparatlar tayyorlash yo‘lga qo‘yiladi:
- vaksina, anatoksin, probiotik va eubiotiklar;
- immunoglobulin va immun zardoblari, gen injenerligi yo‘li bilan olingan monoklonal antitanalar;
- immun korreksiyasi, immun tanqisligi muolajasi va profilaktikasida qo‘llaniladigan immunomodulyatorlar
Ildiz hujayralari yordamida jarohat yoki degenerativ xastaliklar natijasida o‘zgarishga uchragan to‘qimalarni tiklash mumkin. Shu ma’noda, loyihaning amalga oshirilishi tufayli onkologik kasalliklar muolajasi hamda markaziy asab tizimi hujayralarini tiklashda qo‘llanadigan biofarmatsevtik vositalar ishlab chiqarish imkoniyati yaratiladi.
Izoh (0)