Sasseks gersogi shahzoda Garri o‘z otasi, Buyuk Britaniya qiroli Charlz III ning 6-mayga belgilangan toj kiydirish marosimi ssenariysidan chiqarib tashlandi, deb xabar bermoqda Daily Mail.
“An’anani buzgan holda, Charlz ikki gersogning monarxga hurmat ramzi sifatida tiz cho‘kishidan iborat marosimdan voz kechadi. Bu rolni faqat Uilyamning o‘zi amalga oshiradi”, — deyiladi xabarda.
Shu tariqa, Garri otasiga toj kiydirish marosimida hech qanday rasmiy rolga ega bo‘lmaydi.
Nashr ma’lumotlariga ko‘ra, Garrining marosimdan chetlashtirilishiga uning Spare (“Zaxiradagi”) nomli avtobiografik kitobi sabab bo‘lgan, u 10-yanvar kuni sotuvga chiqarilishi kutilmoqda.
Avvalroq Garri Afg‘onistonda xizmat o‘tash chog‘ida 25 nafar “Tolibon” a’zosini o‘ldirganini tan olgandi. Shundan keyin toliblar shahzodani insoniyatga qarshi jinoyatlarda aybladi.
2020-yilda shahzoda Garri va uning rafiqasi Megan Markl qirollik vakolatlaridan voz kechishini e’lon qildi. Ular Britaniya qirollik oilasiga rasman vakillik qilishdan va davlat tomonidan moliyalashtirilishdan to‘xtadi. Shundan keyin er-xotin avval Kanadaga, so‘ng AQSHga ko‘chib o‘tdi.
2022-yil dekabrida Netflix juftlikning hayoti haqidagi “Garri va Megan” hujjatli serialini chiqardi. Mini-serialda gersog va gersoginya o‘z munosabatlari tarixi va Britaniya qirollik oilasidan uzoqlashish haqidagi qarorlari haqida gapirib bergan.
Izoh (0)