Rossiya o‘z armiyasi tomonidan Ukrainada faol qo‘llanilayotgan Eron kamikadze-dronlarini ishlab chiqarishni boshlamoqchi. Bu haqda Ukraina Milliy xavfsizlik va mudofaa kengashi kotibi Aleksey Danilov telemarafon efirida ma’lum qildi.
“Ular bu ishni amalga oshirmoqchi bo‘layotgan shaharlardan biri — Tolyatti, boshqa shaharlar ham bor. Bizning razvedkamiz ko‘plab masalalar bo‘yicha bekam-u ko‘st ishlaydi va biz ular qanday qadamlarni qo‘yishini oldindan bilib turamiz”, — dedi Danilov.
Shu bilan birga, U MXMK kotibi qayd etishicha, Rossiya zarur tarkibiy qismlar tanqisligi sharoitida dronlar ishlab chiqarishni qay tarzda yo‘lga qo‘ymoqchiligidan u bexabar. “Ular o‘z dronlarini nimadan yig‘ishi katta savol bo‘lib turibdi”, — deya qo‘shib qo‘ydi Danilov.
Rossiya armiyasi Ukrainada Eronda ishlab chiqarilgan Shahed-131/136 kamikadze-dronlarini faol ravishda qo‘llamoqda, ularni rossiyaliklar “Geran-1” va “Geran-2” deb qayta nomlab olgan.
Rossiyaning o‘z hududida Eron dronlarini ishlab chiqishni yo‘lga qo‘yish rejalari haqida avvalroq The Washington Post gazetasi xabar bergandi. Nashr ma’lumotlariga ko‘ra, Rossiya va Eron rasmiy shaxslari ishlab chiqarish bo‘yicha 2022-yil noyabrida kelishuvga erishgan.
2023-yil yanvarida CNN telekanali Shahed-136 ning 52 ta detalidan 40 tasi Amerikaning 13 xil kompaniyasi tomonidan tayyorlanganini ma’lum qilgandi. Qolgan 12 ta detal Kanada, Shveysariya, Yaponiya, Tayvan va Xitoyda ishlab chiqarilgan.
Izoh (0)