Gretsiyaning tashqi ishlar va mudofaa bo‘yicha hukumat kengashi Evros daryosi bo‘ylab Turkiya bilan quruqlikdagi chegaraning butun uzunligi bo‘ylab devor qurishga qaror qildi. Bu haqda Daily Sabah xabar berdi.
Fuqaro muhofazasi vaziri Takis Teodorikakosning so‘zlariga ko‘ra, to‘siqning dastlabki 35 kilometrini qurish zudlik bilan boshlanadi. Uning narxi 100 million yevroga baholanmoqda.
“Bizning qo‘shnilarimiz baxtsiz odamlarni ekspluatatsiya qilishning davom etishiga o‘rin yo‘qligini juda yaxshi biladi. Gretsiyaning Evrosdagi chegaralaridan o‘tib bo‘lmaydi va bunga hech qanday shubha yo‘q”, — deb tushuntirdi Teodorikakos.
Hozirda Gretsiya fuqarolarini himoya qilish vazirligi loyihani mamlakat Moliya vazirligi rasmiy tasdiqlashini kutmoqda. Shundan keyin tender e’lon qilinadi.
“2022-yilda Gretsiya politsiyasi 256 ming noqonuniy muhojirning mamlakatga kirishiga to‘sqinlik qilgan va odam savdosi bilan shug‘ullangan 1300 kishini hibsga olgan”, — dedi u va Turkiya noqonuniy migratsiya tashabbuskori ekanini ta’kidladi.
Gretsiya 1821-yilda Usmonli imperiyasidan mustaqillikka erishganidan beri Gretsiya—Turkiya munosabatlari o‘zaro adovat va qisqa muddatli yarashuv davrlari bilan ajralib turadi. Turkiya va Gretsiya o‘rtasidagi ziddiyat bahorda Egey dengizi sharqiy qismidagi orollar maqomi borasidagi kelishmovchiliklar fonida avj oldi. Orollar 1923-yil Lozanna shartnomasidan keyin Gretsiyaga o‘tgan.
Iyun oyida Turkiya prezidenti Rajab Toyyib Erdo‘g‘on Gretsiya orollarda harbiy mashg‘ulotlar o‘tkazayotganini aytgan. Gretsiya o‘z orollarining suverenitetiga tahdidlarga javoban, chegaralarni qayta ko‘rib chiqishga rozi bo‘lmasligini ta’kidlagan.
Izoh (0)