Britaniyaliklar shahzoda Garrini qirollik unvonidan mahrum etishni talab qilmoqda

Britaniyaliklarning katta qismi shahzoda Garri va uning rafiqasi Megan Marklni qirollik unvonlaridan mahrum qilish tarafdori bo‘lib chiqdi. Bu haqda YouGov o‘tkazgan so‘rov natijalari guvohlik bermoqda, deb yozadi The Times.

Ta’kidlanishicha, so‘rov ishtirokchilarining 44 foizi fikricha, shahzoda Garri o‘z unvoni — Sasseks shahzodaligidan mahrum etilishi kerak, ularning 32 foizi esa bunday fikrda emas.

Bundan tashqari, so‘rovda qatnashgan britaniyaliklarning 65 foizi Garri va Megan qirollik majburiyatlaridan o‘z ixtiyori bilan voz kechgan deb hisoblaydi, ularning 11 foizigina juftlik qirollik oilasidan ketishga majbur qilingan, degan fikrda.

Shuningdek, Megan Marklning qirollik oilasi a’zolaridan biri uning farzandi qora tanli bo‘lib tug‘ilganidan norozi bo‘lgani haqidagi gaplarini izohlar ekan, respondentlarning 49 foizi Brfitaniya qirollik oilasini irqchi institutsiya deb hisoblamasligi ma’lum bo‘ldi (26 foizi aksincha fikrda).

So‘rov qatnashchilarining yarmidan ko‘pi (53 foizi) bunday munosabat uchun qirollik oilasi Garri va Megandan kechirim so‘rashi kerak emas, deb hisoblaydi, 19 foizigina ular uzrga arzishini aytgan.

So‘rov mualliflari  respondentlardan Garri va Megan haqidagi Netflix seriali ularning juftlikka bo‘lgan munosabatiga qanday ta’sir qilgani bilan qiziqqan. Ma’lum bo‘lishicha, 23 foiz britaniyaliklar shouni ko‘rganidan keyin Garri va Megan haqidagi fikri yomon tomonga o‘zgargan. Aksincha, 7 foiz aholi ular haqida yaxshiroq fikrda bo‘la boshlagan.

Shu bilan birga, serial ko‘pchilik tomoshabinlarda Garrining akasi shahzoda Uilyam va uning rafiqasi Keyt Middltonga nisbatan munosabatini yaxshi tomonga o‘zgartirgan. Respondentlarning 44 foizi Uilyam va Ketrin, 17 foizi esa Garri va Meganga yon bosgan.

“Garri va Megan” serialining premyerasi 8-dekabr kuni bo‘lib o‘tdi. Kutilgandek, loyiha katta shou-shuvlarga sabab bo‘ldi. Qirolicha Yelizavetta II ning nevarasi shahzoda Garri va uning rafiqasi haqidagi serial 175 million soatdan ortiq ko‘rilgan, shuningdek, 85 dan ortiq mamlakatlarda top-10 talikka kirgan. Netflix’ning yangi loyihasi namoyish etilgandan so‘ng, qirollik oilasi “qayg‘uli holat”ga tushdi. Juftlik qirolicha Yelizavetta II ni masxara qilib, Britaniya va qirollik a’zolari irqchi ekani haqida fikr bildirganlikda ayblandi.

Mavzuga doir:

• Megan Markl va shahzoda Garri ajrashgan taqdirda juftlikning hayotida nimalar o‘zgaradi?
• Shahzoda Garri ota-onasidan ayrilgan bolalar uchun O‘rgimchak odamga aylandi (video).