AQSH hukumati hali ham Ukrainaga qurol-yarog‘larni ulardan Rossiya hududlariga zarbalar berishda foydalanmaslik sharti bilan yetkazib bermoqda. Bu haqda amerikalik sharhlovchi Andreas Klut Bloomberg uchun yozgan maqolasida aytib o‘tdi.
Sharhlovchining fikricha, AQSH hukumati Rossiyaga zarbalar berilishiga imkoniyat yaratish orqali “qizil chiziq”ni bosib o‘tishni istamaydi, chunki bu Rossiya hukumatini yadro qurolidan foydalanishga gijgijlashi mumkin.
Rossiya harbiy doktrinasiga muvofiq, ommaviy qirg‘in quroli yoki oddiy qurol-yarog‘lardan foydalanib mamlakatga nisbatan tajovuz qilingan yoki davlatning mavjudligi xavf ostiga qo‘yilgan taqdirda, yadro quroli qo‘llanilishi mumkin.
Sentabrda Ukrainaning AQSHdagi elchisi Oksana Markova qurollardan Rossiyaga zarbalar berishda foydalanish uchun taqiq faqat HIMARS’ga taalluqli ekanini aytgandi. The Wall Street Journal gazetasi manbalariga ko‘ra, AQSH Ukrainaga HIMARS’larni jo‘natishdan avval ularning o‘q uzish masofasini qisqartirgan va shu bilan Ukraina harbiylarining Rossiya hududiga zarba berish ehtimoliga to‘sqinlik qilmoqchi bo‘lgan.
Dekabrda Britaniyaning The Times gazetasi o‘z manbalariga tayanib AQSH Rossiya hududiga zarbalar bo‘yicha Ukrainaga nisbatan talablarga yondashuvini o‘zgartirgani haqida yozgandi. Go‘yoki, endi Vashington faqat rossiyalik oilalarga hujum qilmaslik va muayyan shaxslarni yo‘q qilmaslikni so‘ramoqda.
Avvalroq Ukraina AQSHdan ATACMS raketalarini so‘ragani, biroq rad javobini olgani xabar berilgandi. AQSH prezidenti Jo Bayden bilan uchrashuvda Ukraina prezidenti Vladimir Zelenskiy Kiyevga uzoq masofali ATACMS raketalarini yetkazib berish masalasini ko‘targan. OAVlar shunday qurol yetkazish haqidagi kelishuvlar Zelenskiyning Vashingtonga tashrifidan ko‘zlangan asosiy maqsad bo‘lgani haqida yozgandi. AQSH bunday qurol vaziyat keskinlashishiga sabab bo‘lishi mumkin, degan pozitsiyasini saqlab qolgan va fikrini o‘zgartirmagan.
Mavzuga doir:
Izoh (0)