Shahzoda Garri Afg‘onistonda xizmat o‘tash chog‘ida 25 nafar “Tolibon” a’zosini o‘ldirganini aytdi

Sasseks gersogi Garri 2012—2013-yillarda Afg‘oniston janubida xizmat safari chog‘ida “Tolibon” harakatining 25 nafar a’zosini o‘ldirgan. Bu haqda Britaniya qirollik oilasi a’zosi shahzoda Garri o‘zining Spare (“Zaxiradagi”) memuarlarida gapirib berdi.

“Men birinchi kundanoq o‘z oldimga maqsad qo‘ygandim — to‘g‘ri ish qildimmi-yo‘qmi, faqat ‘Tolibn’ga o‘q uzdimmi, tinch aholiga tegmadimi, degan gumonlar bilan uxlashga yotmaslik haqida. Men Buyuk Britaniyaga oyoq-qo‘llarim sog‘ holatda, bundan ham muhimrog‘i — vijdonim bus-butun ahvolda qaytishni xohlardim”, — deb yozdi shahzoda Garri o‘z kitobida.

Yelizaveta II ning nabirasi tan olishicha, o‘zi o‘ldirgan toliblar sonidan u uyalmaydi, ammo “mamnun ham emas”. U “Tolibon” tashkiloti a’zolariga yovuz jinoyatchilar sifatida qaragan va ular “yaxshi yigitlar”ni o‘ldirishiga yo‘l qo‘ymaslik uchun ularni yo‘q qilish kerak, deb hisoblagan. Sasseks gersogi fikricha, “Tolibon” “insoniyat dushmani” bo‘lib, ular tarixdagi eng dahshatli jinoyatlardan biri uchun javobgardir.

2006-yilda Garri Sandxyorstdagi Qirollik harbiy akademiyasini tugatib, 2008-yilda o‘n hafta mobaynida Afg‘onistonning Hilmand viloyatida yashirincha jang qilgan. Shuningdek, u 2012-yilning sentabridan 2013-yilning yanvarigacha ham Afg‘onistondagi jangovar operatsiyalarda qatnashgan. O‘shanda u Apache zarbdor vertolyotida turib, isyonchilarni o‘ldirganini tan olgandi.