Сассекс герцоги шаҳзода Гарри ўз отаси, Буюк Британия қироли Чарльз III нинг 6 майга белгиланган тож кийдириш маросими сценарийсидан чиқариб ташланди, деб хабар бермоқда Daily Mail.
«Анъанани бузган ҳолда, Чарльз икки герцогнинг монархга ҳурмат рамзи сифатида тиз чўкишидан иборат маросимдан воз кечади. Бу ролни фақат Уильямнинг ўзи амалга оширади», — дейилади хабарда.
Шу тариқа, Гарри отасига тож кийдириш маросимида ҳеч қандай расмий ролга эга бўлмайди.
Нашр маълумотларига кўра, Гаррининг маросимдан четлаштирилишига унинг Spare («Захирадаги») номли автобиографик китоби сабаб бўлган, у 10 январь куни сотувга чиқарилиши кутилмоқда.
Аввалроқ Гарри Афғонистонда хизмат ўташ чоғида 25 нафар «Толибон» аъзосини ўлдирганини тан олганди. Шундан кейин толиблар шаҳзодани инсониятга қарши жиноятларда айблади.
2020 йилда шаҳзода Гарри ва унинг рафиқаси Меган Маркл қироллик ваколатларидан воз кечишини эълон қилди. Улар Британия қироллик оиласига расман вакиллик қилишдан ва давлат томонидан молиялаштирилишдан тўхтади. Шундан кейин эр-хотин аввал Канадага, сўнг АҚШга кўчиб ўтди.
2022 йил декабрида Netflix жуфтликнинг ҳаёти ҳақидаги «Гарри ва Меган» ҳужжатли сериалини чиқарди. Мини-сериалда герцог ва герцогиня ўз муносабатлари тарихи ва Британия қироллик оиласидан узоқлашиш ҳақидаги қарорлари ҳақида гапириб берган.
Изоҳ (0)