“Tolibon” harakati vakillari shahzoda Garridan insoniyatga qarshi jinoyatlari uchun sud oldida javob berishni talab qildi. Avvalroq OAVlarda qirolicha Yelizaveta II ning nevarasi yozgan avtobiografik kitobdan parchalar e’lon qilingandi. Unda Sasseks gersogi Afg‘onistonda xizmat o‘tash chog‘ida 25 nafar tolibni o‘ldirganini tan olgandi.
“Siz o‘ldirganlar shaxmat donachalari bo‘lmagan, ular odamlar bo‘lgan; ularning ham oilalari bo‘lgan, uning uyga qaytishini kutgan”, — deb yozdi Afg‘oniston ichki ishlar vazirining katta yordamchisi Anas Haqqoniy Twitter’da.
Toliblarning boshqa vakili, tashkilot siyosiy idorasi rahbari Suhayl Shohin Sky News’ga ma’lum qilishicha, shahzoda Garri “insoniyatga qarshi jinoyat sodir etgan”.
“Ular (toliblar) o‘z mamlakati ozodligi uchun kurashuvchilar edi, siz esa (NATO, shu jumladan, Britaniya) istilochilar edingiz. Ular qonuniy ishni amalga oshirgan. Ular xalq qahramonlari bo‘lgan, siz esa ularning dushmanlari bo‘lgansiz”, — dedi Shohin.
Uning qo‘shimcha qilishicha, Sasseks gersogi insoniyatga qarshi jinoyatalr haqidagi ish bo‘yicha sud tomonidan so‘roq qilinishi kerak. Shuningdek, u mamlakatining xalqi qirollik oilasiga la’natlar yog‘dirganini aytdi.
2006-yilda Garri Sandxyorstdagi Qirollik harbiy akademiyasini tugatib, 2008-yilda o‘n hafta mobaynida Afg‘onistonning Hilmand viloyatida yashirincha jang qilgan. Shuningdek, u 2012-yilning sentabridan 2013-yilning yanvarigacha ham Afg‘onistondagi jangovar operatsiyalarda qatnashgan. O‘shanda u Apache zarbdor vertolyotida turib, isyonchilarni o‘ldirganini tan olgandi.
Mavzuga doir:
- Britaniyaliklar shahzoda Garrini qirollik unvonidan mahrum etishni talab qilmoqda
- Megan Markl va shahzoda Garri haqidagi serial Netflix tarixidagi eng yirik hujjatli debyutga aylandi (video)
- Buyuk Britaniya qiroli Charlz III ning kenja o‘g‘li Garri butun umri davomida boshqa ism bilan chaqirilganini ma’lum qildi
Izoh (0)