Braziliya politsiyasi sobiq prezident Jair Bolsonaruning tarafdorlari tomonidan namoyishlar bilan egallab olingan Planalto prezident saroyi, shuningdek, Milliy Kongress va Oliy sud binolarini ozod qildi, deb xabar bermoqda CNN Brasil.
Tartibsizliklardan keyin 400 dan ortiq odam hibsga olingan. “Ular qilgan jinoyatlari uchun javob beradi”, — deb va’da qildi Braziliya federal okrugi gubernatori Ibanez Rocha. Rochaning o‘zi “harakatsizlik va beparvolik” uchun Oliy sud qarori bilan 90 kunga lavozimidan chetlatildi.
Amaldagi davlat rahbari Luis Inasiu Lula da Silvaning aytishicha, tartibsizlik ishtirokchilarining barchasi “aniqlanadi va jazoga tortiladi”. Politsiya saroy binolarini tekshirib chiqqanidan so‘ng Lula da Silva rafiqasi bilan ishchi qarorgohiga tashrif buyurdi, deb xabar bermoqda Globo.
Tartibsizliklar boshlangan paytda da Silva poytaxtda bo‘lmagan, u suv toshqini oqibatlarini tekshirish uchun San-Paulu shtatiga ketgan edi. Prezident Braziliyada yanvar oyi oxirigacha favqulodda holat e’lon qildi.
Namoyishlarda asosan, o‘ta o‘ngchi Bolsnaru tarafdorlari ishtirok etgan, ular sobiq prezidentning saylovlardagi mag‘lubiyatini tan olishdan bosh tortgan (Bolsonaru 49,2 foiz, Lula da Silva esa 50,8 foiz ovoz olgandi). Mamlakat adliya vaziri Flavio Dino hujumchilarning harakatlarini “terrorizm” deb atadi va ularni davlat to‘ntarishiga urinishda aybladi.
O‘z navbatida, Bolsonaru sodir bo‘layotgan voqealarni qoralab, “o‘g‘irlik va jamoat binolariga kirish belgilangan tartibni buzadi”, dedi. Sobiq prezident dekabr oyi oxirida, muddati tugashiga ikki kun qolganda mamlakatni tark etgandi. Hozir u Amerikaning Florida shtatida, Orlandoda, deb yozadi The New York Times.
Lulani dunyo yetakchilari, jumladan, Fransiya va AQSH prezidentlari Emmanuel Makron va Jo Bayden hamda Italiya bosh vaziri Jorj Meloni qo‘llab-quvvatlagan. BMT Bosh kotibi Antoniu Guterrish “Braziliya demokratik institutlariga qilingan hujumni” qoralagan bo‘lsa, Yevropa diplomatiyasi rahbari Jozep Borrel “Braziliya demokratiyasi zo‘ravonlik va ekstremizmni yengishiga” umid bildirgan.
Izoh (0)