Shahzoda Garri rafiqasi Megan Markl tufayli o‘z akasi, Uels shahzodasi Uilyam bilan mushtlashib qolgani, akasi unga tashlangani haqida gapirib berdi. Bu voqea Sasseks gersogining Spare (“Zaxiradagi”) avtobiografik kitobidan o‘rin oldi, u 10-yanvarda nashrdan chiqadi. Memuardan olingan parchalarni kitobning nusxasini qo‘lga kiritgan The Guardian tomonidan e’lon qilindi.
Shahzodalar o‘rtasidagi kelishmovchilik 2019-yilda Nottingem kottejida yuz bergan, u yerda o‘sha vaqtda Garri va Megan istiqomat qilardi. Kitobda aytilishicha, shahzoda Uilyam o‘zaro munosabatlaridagi falokatni va juftlikning matbuot bilan kurashini muhokama qilish uchun darg‘azab holatda kelgan.
Uilyam Megandan shikoyat qilgan, uni “og‘ir tabiatli, qo‘pol va keskin” deb atagan. Bunga javoban Garri akasi matbuotda rafiqasi haqida aytilgan gaplarni takrorlayotganini bildirgan. Oxir-oqibat, ularning bahsi mushtlashuvga aylanib ketgan.
“Hammasi juda tez yuz berdi. U mening yoqamdan tutib, yerga yiqitdi. Men itning kosasi ustiga yiqildim, u sinib ketdi va bo‘laklari tanamga sanchildi. Biroz vaqt esankirab shu ahvolda yotdim, keyin esa turib, unga tuyog‘ini shiqillatishini aytdim”, — deb yozadi shahzoda o‘z memuarlarida.
Shundan keyin Uilyam Garridan xuddi bolalikdagi kabi qaytarib urishni talab qilgan, ammo u bosh tortgan. Akasi ketgan, so‘ng qaytib kelib, kechirim so‘ragan. Keyinroq Garriga bo‘lgan voqea haqida Meganga aytmaslikni maslahat bergan.
Shahzoda rafiqasi uning yuzidagi jarohatlarni ko‘rganidan keyin akasi bilan mushtlashganini aytgan. U ko‘p ham hayron qolmagan va jahli chiqmagan, shunchaki “juda xafa bo‘lgan”, deyiladi memuarlarda.
2020-yilda shahzoda Garri va uning rafiqasi Megan Markl qirollik vakolatlaridan voz kechishini e’lon qildi. Ular Britaniya qirollik oilasiga rasman vakillik qilishdan va davlat tomonidan moliyalashtirilishdan to‘xtadi. Shundan keyin er-xotin avval Kanadaga, so‘ng AQSHga ko‘chib o‘tdi.
2022-yil dekabrida Netflix juftlikning hayoti haqidagi “Garri va Megan” hujjatli serialini chiqardi. Mini-serialda gersog va gersoginya o‘z munosabatlari tarixi va Britaniya qirollik oilasidan uzoqlashish haqidagi qarorlari haqida gapirib bergan.
Mavzuga doir:
Izoh (0)