“Yuksalish” umummilliy harakati O‘zbekistonda kelasi hafta anomal sovuq ob-havo kutilayotgani sababli bir qator takliflar bilan chiqdi.
Xususan, barcha ish beruvchilarni xodimlarining ish joyida bo‘lishiga ehtiyoj bo‘lmasa, ular onlayn ishlashiga ruxsat berishga chaqirdi. Harakat ham davlat, ham xususiy sektordagi barcha ish beruvchilar ish jarayonlarini tashkil etishni chuqurroq ko‘rib chiqish kerakligini, mehnat sharoitlari bilan tanishib chiqib, xodimlarni qulay harorat rejimi bilan ta’minlash zarurligini ta’kidladi.
“Pandemiya bunday formatda ham berilgan vazifalarni samarali bajarish mumkinligini ko‘rsatdi. Qolaversa, bu yo‘llarni tirband qilmasdan, qor va muzlardan tozalab olinishiga sharoit yaratadi”, — deyiladi xabarda.
Qayd etilishicha, “Yuksalish” harakati jamoasi 9—15-yanvar kunlari masofadan ishlashga o‘tmoqda. Markaziy idora joylashgan binoning isitish tizimidagi qiyinchiliklar sababli shunday qarorga kelindi. Hududiy bo‘linmalar ham onlayn formatga o‘tmoqda.
Shuningdek, ish soatlarini, ayniqsa, ochiq havoda ishlaydiganlar uchun qisqartirish, imkon qadar xodimlar uchun issiq ichimliklar tashkil qilish, sovuqqotish holatlarining oldini olish uchun tanaffus berish yoki o'rin almashtirish taklif etildi.
Bundan tashqari, yirik savdo va aholiga xizmat ko'rsatish markazlarida issiq choy berishni tashkil qilish o‘rinli bo‘lishi bildirilgan.
Noqulay ob-havoda yo‘llarda yengil avtomobillar soni keskin kamayishi sababli jamoat transporti uzluksiz harakatlanishini ta’minlash kerakligi ta’kidlangan.
“Muhimi, bee’tibor bo‘lmaylik, qishning sovuq kunlarida iliqlik ulashib, bir-birimizga yordam beraylik. Mahallangizdagi yolg‘iz keksa qo‘shnilar, ko‘p bolali oilalar, farzandini yolg‘iz tarbiyalayotgan onalardan xabar oling. Ulardan isitish tizimi, elektr, gaz borligini so‘rang, balki kimgadir o‘tin yoki ko‘mir kerakdir? Issiq kiyimlari yo‘qdir. O‘zingizda borini ular bilan ham bo‘lishing. Shaxsiy avtomobilda harakatlanganda ham bir manzilga boruvchi yo‘lovchilarni olib keting”, — deya aholini bunday kunlarda bir-birlariga yordam berishga chaqirgan “Yuksalish”.
Izoh (0)