Qoraqalpog‘istonda “Dok-1 Maks”dan zaharlangan ikki nafar bola davolanish uchun Toshkentga olib kelingan. Bu haqda respublika Sog‘liqni saqlash vaziri o‘rinbosari Akmal Asqarov “Qaraqalpaqstan” telekanaliga bergan suhbatida gapirgan.
Suhbatda vazir o‘rinbosari Quramax dorilari atrofidagi xabarlarga izoh bergan.
Ta’kidlanishicha, Qoraqalpog‘istonga ham o‘z vaqtida Quramax kompaniyasining dori mahsulotlari kirib kelgan. Uning tarkibiga qo‘shilgan zaharli elementlar sabab yosh bolalarda buyrak to‘qimalarining zararlanishi sodir bo‘lgan. Oqibatda bolalarning ahvoli yomonlashib, ba’zida o‘lim holatlari ham kuzatilgan.
“Bolalarning ahvoli o‘rtacha. Juda yaxshi ham emas, juda yomon ham. Kunlik muolaja va kerakli tibbiy choralar ko‘rilmoqda”, — deya “Daryo”ga qo‘shimcha qildi vazirlik axborot xizmati rahbari Sultanbek Ziyayev.
Akmal Asqarovning aytishicha, bugungi kunda Qoraqalpog‘istonda ham bu kompaniyaga tegishli, 2022-yilda kirib kelgan dori vositalar savdosi to‘xtatilgan va bu haqda xalq orasida tushintirish ishlari olib borilmoqda.
Qo‘shimcha qilinishicha, O‘zbekiston Sog‘liqni saqlash vazirligi tomonidan tuzilgan ishchi guruh Qoraqalpog‘istondagi holatni o‘rganish maqsadida 2023-yilning 1—3-yanvar kunlari respublikada bo‘lib qaytgan.
Avvalroq “Dok-1 Maks” va “Ambronol” dori vositalari belgilangan tartibda laboratoriya sinovlaridan o‘tkazilmagani, Quramax Medical’ning ikki nafar rahbari, “Dori vositalarini standartlashtirish ilmiy markazi”ning esa ikki nafar mas’ul xodimi hibsga olingani xabar qilingandi.
Izoh (0)