«Юксалиш» умуммиллий ҳаракати Ўзбекистонда келаси ҳафта аномал совуқ об-ҳаво кутилаётгани сабабли бир қатор таклифлар билан чиқди.
Хусусан, барча иш берувчиларни ходимларининг иш жойида бўлишига эҳтиёж бўлмаса, улар онлайн ишлашига рухсат беришга чақирди. Ҳаракат ҳам давлат, ҳам хусусий сектордаги барча иш берувчилар иш жараёнларини ташкил этишни чуқурроқ кўриб чиқиш кераклигини, меҳнат шароитлари билан танишиб чиқиб, ходимларни қулай ҳарорат режими билан таъминлаш зарурлигини таъкидлади.
«Пандемия бундай форматда ҳам берилган вазифаларни самарали бажариш мумкинлигини кўрсатди. Қолаверса, бу йўлларни тирбанд қилмасдан, қор ва музлардан тозалаб олинишига шароит яратади», — дейилади хабарда.
Қайд этилишича, «Юксалиш» ҳаракати жамоаси 9—15 январь кунлари масофадан ишлашга ўтмоқда. Марказий идора жойлашган бинонинг иситиш тизимидаги қийинчиликлар сабабли шундай қарорга келинди. Ҳудудий бўлинмалар ҳам онлайн форматга ўтмоқда.
Шунингдек, иш соатларини, айниқса, очиқ ҳавода ишлайдиганлар учун қисқартириш, имкон қадар ходимлар учун иссиқ ичимликлар ташкил қилиш, совуққотиш ҳолатларининг олдини олиш учун танаффус бериш ёки ўрин алмаштириш таклиф этилди.
Бундан ташқари, йирик савдо ва аҳолига хизмат кўрсатиш марказларида иссиқ чой беришни ташкил қилиш ўринли бўлиши билдирилган.
Ноқулай об-ҳавода йўлларда енгил автомобиллар сони кескин камайиши сабабли жамоат транспорти узлуксиз ҳаракатланишини таъминлаш кераклиги таъкидланган.
«Муҳими, бееътибор бўлмайлик, қишнинг совуқ кунларида илиқлик улашиб, бир-биримизга ёрдам берайлик. Маҳаллангиздаги ёлғиз кекса қўшнилар, кўп болали оилалар, фарзандини ёлғиз тарбиялаётган оналардан хабар олинг. Улардан иситиш тизими, электр, газ борлигини сўранг, балки кимгадир ўтин ёки кўмир керакдир? Иссиқ кийимлари йўқдир. Ўзингизда борини улар билан ҳам бўлишинг. Шахсий автомобилда ҳаракатланганда ҳам бир манзилга борувчи йўловчиларни олиб кетинг», — дея аҳолини бундай кунларда бир-бирларига ёрдам беришга чақирган «Юксалиш».
Изоҳ (0)