“Dok-1 Maks” va “Ambronol” dori vositalari belgilangan tartibda laboratoriya sinovlaridan o‘tkazilmagan — DXX

“Dok-1 Maks” preparati bilan bog‘liq holat yuzasidan Davlat xavfsizlik xizmati tomonidan jinoyat ishi qo‘zg‘atilgandi. Dastlabki tergov harakatlari davomida aniqlanishicha, “Dok-1 Maks” va “Ambronol” dori vositalari belgilangan tartibda laboratoriya sinovlaridan o‘tkazilmagan.

Ma’lum qilinishicha, Quramax Medical MCHJ tomonidan O‘zbekistonga import qilingan ushbu preparatlar “Dori vositalarini standartlashtirish ilmiy markazi” MCHJ tomonidan laboratoriya sinovlaridan o‘tkazilgan hamda ularga muvofiqlik sertifikatlari rasmiylashtirilgan.

Dastlabki tergov harakatlari davomida aniqlanishicha, “Dori vositalarini standartlashtirish ilmiy markazi” MCHJ mas’ul xodimlari tomonidan me’yoriy-huquqiy hujjat talablari qo‘pol ravishda buzilib, ushbu dori vositalari belgilangan tartibda laboratoriya sinovlaridan o‘tkazilmaganligi natijasida, sifatsiz preparatlarning sotuvga chiqarilishiga yo‘l qo‘yilgan.

Jinoyat ishi doirasida Quramax Medical MCHJning ikki nafar rahbar xodimlari hamda “Dori vositalarini standartlashtirish ilmiy markazi” MCHJning ikki nafar mas’ul xodimlari gumonlanuvchi shaxslar sifatida DXX Tergov hibsxonasiga tegishli tartibda joylashtirilgan.

Ko‘rilgan chora-tadbirlar natijasida Quramax Medical MCHJ tomonidan Hindistondan O‘zbekistonga import qilinayotgan dori vositalarining bojxona nazoratidan o‘tkazilishi to‘xtatildi hamda respublika dorixonalaridagi bunday preparatlar yig‘ib olindi. Hozirda bu boradagi tadbirlar davom ettirilmoqda.

“Quramax Medical MCHJga tegishli dori vositalarini O‘zbekistonda belgilangan tartibda ro‘yxatdan o‘tkazilganligi hamda sog‘liqni saqlash tizimidagi mutasaddi xodimlarning ushbu holat bo‘yicha amalga oshirgan harakatlarini tekshirish yuzasidan zarur chora-tadbirlar amalga oshirilmoqda.

Hurmatli fuqarolar, shu o‘rinda, ehtimoliy salbiy holatlarning oldini olish maqsadida, mazkur mavzuga oid tekshirilmagan yoki asossiz ma’lumotlarni tarqatmasligingizni so‘raymiz”, — deyiladi DXX xabarida.

Mavzuga doir: O‘zbekistonda “Dok-1 Maks”ning qancha partiyasi bojxona omborida saqlanayotgani ma’lum qilindi