Samarqand viloyatining Oqdaryo tumanidagi uyda er-xotin va ularning besh oylik farzandi o‘lik holda topildi. Bu haqda “Daryo”ga Bosh prokuratura matbuot xizmati xabar berdi.
Ma’lum qilinishicha, 2022-yil 24-dekabr kuni soat 23:22 da Oqdaryo tuman tibbiyot birlashmasi tez tibbiy yordam bo‘limining Samarqand viloyat IIB 102 operatoriga bergan xabariga ko‘ra, tez yordam chaqiruviga asosan Oqdaryo tumani “Galaravot” mahallasida yashovchi fuqaro A.A.ning uyiga borilganda, ushbu xonadon egasi, uning turmush o‘rtog‘i M.A. va ularning besh oylik o‘g‘li M.P.ning jasadi topilgan.
Mazkur xabarga asosan tergov-tezkor guruhi a’zolari tomonidan hodisa joyi ko‘zdan kechirilganda ayolning bo‘yin sohasi chap yon tomonida ikki dona sanchib-kesilgan jarohati bilan, yoshga to‘lmagan bola tan jarohatsiz hamda xonadon egasi ushbu hovlining og‘ilxonasi cherdak qismiga arqon bilan bo‘ynidan osilgan holatda topilgan.
Dastlabki tezkor ma’lumotlar hamda guvohlarning ko‘rsatuvlariga ko‘ra, A.A. ayoli bilan oilaviy kelishmovchilik oqibatida janjallashib, uni qaychi bilan bo‘yin sohasiga ikki marta urib o‘ldirib, so‘ngra beshikda yotgan besh oylik farzandini qo‘llari bilan bo‘g‘ib o‘ldirib, keyin o‘zini o‘zi osib, o‘z joniga qasd qilgan.
Respublika shoshilinch tibbiy yordam ilmiy markazi Samarqand filialining dastlabki ma’lumotnomasida, 21 yoshli marhuma M.A.ning o‘limi bo‘yin sohasi chap yon tomonida ikki dona sanchib-kesilgan jarohati natijasida, besh oylik M.P.ning o‘limi bo‘g‘ilishi natijasida nafas yetishmovchiligidan, hamda 28 yoshli A.A.ning o‘limi bo‘ynidan arqon bilan osilishida mexanik asfiksiyadan kelib chiqqani ko‘rsatilgan.
Ayni paytda holat yuzasidan Jinoyat kodeksining 97-moddasi ikkinchi qismi “a” va “v” bandlari (ikki yoki undan ortiq shaxsni, aybdorga ayon bo‘lgan ojiz ahvoldagi shaxsni qasddan o‘ldirish) bilan jinoyat ishi qo‘zg‘atilgan, dastlabki tergov harakatlari olib borilmoqda.
Izoh (0)