Shimoliy Koreya yetakchisi Kim Chen In “sevimli qizalog‘i”ni o‘ziga davomchi qilib tarbiyalamoqda, deyiladi New York Times gazetasi maqolasida.
Ta’kidlanishicha, yaqindan boshlab Kim Chen In omma oldiga ko‘pincha qizi bilan chiqmoqda. Xorijlik ekspertlarning hech biri uning aniq ismini va yoshini ayta olmasa-da, uning to‘satdan ommaga piar qilinishi KXDR rahbari uni o‘ziga davomchi sifatida tarbiyalayotganidan darak berishi mumkin.
Shimoliy Koreya davlat OAVlari tomonidan taqdim etilgan fotosuratlarda noyabr oyida raketalar uchirilib, sinab ko‘rilganidan keyin Kim Chen In qizi bilan aks etgan.
Yangi yilga yaqin Shimoliy Koreya davlat matbuoti yana ularning birgalikdagi suratini e’lon qildi, u qachon olingani noma’lum, biroq unda ota-bola raketa-yadro obyektiga tashrif buyurgani aks etgan.
Janubiy Koreya Milliy razvedka boshqarmasi keyinroq qizchaning ismini Kim Chju E deb atadi.
U haqda 2013-yilda KXDRga borib kelgan taniqli basketbolchi Dennis Rodman gapirgandi, u hatto qizchani qo‘lida ko‘targanini ham aytgan.
Chju Ening jamoatchilik oldiga chiqishi Pxenyan tomonidan Kim Chen Inning farzandi borligi tasdiqlanishi bilan bog‘liq birinchi holatdir. U davlat OAVlarida ko‘rinish berishidan avval oddiy shimoliy koreyalikalr o‘z yetakchilarining birorta ham farzandini ko‘rmagan.
Janubiy Koreyada da’vo qilishlaricha, Kim Chen Inning uchta farzandi bor. To‘ng‘ichi farzandi, katta ehtimol bilan, o‘g‘il. Chju E uning ikkinchi farzandi bo‘lib, u taxminan o‘n yoshda.
“Fotosuratlar puxtalik bilan ishlab chiqilgan dasturning bir qismi bo‘lishi kerak, shu orqali shimoliy koreyaliklarga Kim Chju E uning davomchisi bo‘lishini ko‘rsatishyapti”, — dedi Janubiy Koreyadagi Sejong institutida Kimning oilasini anchadan buyon o‘rganib kelayotgan tadqiqotchi Chon Son Chan.
Ko‘pchilik tahlilchilar shunday fikrga keldiki, Kim Chen In yadro arsenali bilan bog‘liq tadbirlarga farzandlaridan birini olib borish bilan u shimoliy koreyaliklarga, ayniqsa, yoshlarga o‘z oilasining sulolaviy boshqaruvi va yadro qurolining ishlab chiqilishi keyingi avlodda ham davom etishini eslatib qo‘ygan.
2016-yilda Janubiy Koreya qochib o‘tgan va ayni paytda Seulda deputatlik qilayotgan KXDR sobiq diplomati Te Yon Xo jurnalistlarga aytishicha, KXDR qaysidir bolaga sajda qilishni boshlaganidan keyingina Kim Chen In o‘zining davomchisini tanlaganidan dunyo xabar topadi, Kimning o‘zi bilan xuddi shunday holat bo‘lgan.
Izoh (0)