AQSH Xitoy hukumatiga COVID-19 tarqalishiga qarshi kurashish uchun zarur bo‘lgan zamonaviy mRNK vaksinalarini yetkazib berishni taklif qildi, biroq rad javobini oldi. Bu haqda Bloomberg o‘z manbalariga tayanib xabar bermoqda. Agentlik suhbatdoshlarining ta’kidlashicha, masalaning alohida “siyosiy nozikligi”ni inobatga olgan holda, vaksinalarni vositachilar orqali yetkazib berishni yo‘lga qo‘yish taklif qilingan.
Bloomberg ma’lumotlariga ko‘ra, vaksinalarni yetkazib berish bo‘yicha takliflar AQSHning yuqori martabali diplomatlari, jumladan, AQSH Davlat kotibi yordamchisi Deniel Kritenbrink va AQSH Milliy xavfsizlik kengashida Xitoy munosabatlarini nazorat qiluvchi Lora Rozenbergerning dekabr oyida Xitoyga tashrifi chog‘ida bildirilgan.
Xitoyda infeksiyaga chalinayotganlar sonining ko‘payishi va virusning yangi shtammlari paydo bo‘lishidan xavotirga tushgan Amerika rasmiylari so‘nggi haftalarda o‘z sa’y-harakatlarini kuchaytirmoqda, ammo har safar rad javobini olmoqda. Xitoy rasmiylari vaziyat nazorat ostida ekanini va yordamga muhtoj emasligini ta’kidlamoqda, dedi agentlik suhbatdoshlari.
Vashingtondagi Xitoy elchixonasi vakilining aytishicha, Xitoyda ishlab chiqilgan vaksinalar yuqori samaradorlikka ega bo‘lib, ularning ishlab chiqarilishi nafaqat mamlakatning ichki ehtiyojlarini qondirish, balki eksport qilish imkoniyatini ham yaratadi.
Xitoy rasmiylarining AQSHdan vaksina olishga rozi bo‘lmayotgani haqida gap ketar ekan, Bloomberg Pekin inqirozlar paytida har doim tashqi yordamdan bosh tortishi, hozirgi sharoitda esa bunga rozilik Xitoyning mustaqil ravishda samarali mRNK vaksinalarini ishlab chiqishga qodir emasligini ko‘rsatishini ta’kidladi.
“Hatto halokatli COVID-19 epidemiyasi o‘rtasida ham Pekin vaksina millatchiligini namoyish etishda davom etmoqda — bu, shubhasiz, behuda o‘limga olib keladigan qaror”, — dedi Strategik va xalqaro tadqiqotlar markazining Xitoy bo‘limi rahbari Jud Blanshett.
Avvalroq Yevroittifoq hukumati Xitoyga COVID-19 ning yangi to‘lqiniga qarshi kurashda yordam sifatida virusga qarshi bepul vaksinalarni yetkazib berishni taklif qilgan edi. Sog‘liqni saqlash masalalari bo‘yicha yevrokomissar Stella Kiriakides koronavirusning dunyo bo‘ylab qaytadan avj olishi ehtimoliga “yevropacha javob”ni ishlab chiqmoqchiligi aytilgandi.
Izoh (0)