AQSH Turkiya nomining yozilishini rasman Turkiye deb o‘zgartirdi. Buni Davlat departamenti tasdiqladi, deb xabar bermoqda Deutsche Welle.
Bir necha oy avval Turkiya prezidenti Rajab Toyyib Erdo‘g‘on hukumati dunyo davlatlari va xalqaro tashkilotlarni Turkiya (inglizcha imlosi Turkey)ni kurka parrandasi (inglizcha turkey) nomidan farqlash maqsadida mamlakat nomining turkcha imlosini qabul qilishga chaqirgandi.
Imlo o‘zgarishi birinchi marta AQSH Davlat departamenti tomonidan AQSH va Turkiyaning ISHIDni moliyalashtirishda gumon qilinganlarga qarshi qo‘shma harakatlari haqidagi bayonotida ko‘zga tashlangan. Keyinroq rasmiylar imlo o‘zgarganini tasdiqladi, biroq talaffuz o‘zgarishsiz qolishini aytdi.
“Turkiya elchixonasi bizdan o‘zaro aloqalarda ushbu imlodan foydalanishimizni so‘radi. Departament siz bugun ko‘rgan imlodan ko‘plab rasmiy diplomatik va ikki tomonlama kontekstlarda, jumladan, ommaviy kommunikatsiyalarda ham foydalanmoqda”, — dedi Davlat departamenti matbuot kotibi Ned Prays.
AQSH Davlat departamenti xorijiy davlat nomlari uchun stilistik qoidalarini kamdan-kam o‘zgartiradi.
2021-yilda Erdo‘g‘on lotin yozuvidan foydalanadigan davlatlar va xalqaro tashkilotlarda Turkiye imlosini izchil qo‘llash haqida farmon chiqargandi. O‘zgartirilgan nom Birlashgan Millatlar Tashkiloti (BMT) va NATO, shuningdek, Kanada, Hindiston, Avstraliya va Yangi Zelandiya tomonidan qo‘llanmoqda.
Izoh (0)