Ким Чен Ин қизини ўзига давомчи қилиб тарбияламоқда — ОАВ

Шимолий Корея етакчиси Ким Чен Ин «севимли қизалоғи»ни ўзига давомчи қилиб тарбияламоқда, дейилади New York Times газетаси мақоласида.

Таъкидланишича, яқиндан бошлаб Ким Чен Ин омма олдига кўпинча қизи билан чиқмоқда. Хорижлик экспертларнинг ҳеч бири унинг аниқ исмини ва ёшини айта олмаса-да, унинг тўсатдан оммага пиар қилиниши КХДР раҳбари уни ўзига давомчи сифатида тарбиялаётганидан дарак бериши мумкин.

Шимолий Корея давлат ОАВлари томонидан тақдим этилган фотосуратларда ноябрь ойида ракеталар учирилиб, синаб кўрилганидан кейин Ким Чен Ин қизи билан акс этган.

Янги йилга яқин Шимолий Корея давлат матбуоти яна уларнинг биргаликдаги суратини эълон қилди, у қачон олингани номаълум, бироқ унда ота-бола ракета-ядро объектига ташриф буюргани акс этган.

Жанубий Корея Миллий разведка бошқармаси кейинроқ қизчанинг исмини Ким Чжу Э деб атади.

У ҳақда 2013 йилда КХДРга бориб келган таниқли баскетболчи Деннис Родман гапирганди, у ҳатто қизчани қўлида кўтарганини ҳам айтган.

Чжу Энинг жамоатчилик олдига чиқиши Пхеньян томонидан Ким Чен Иннинг фарзанди борлиги тасдиқланиши билан боғлиқ биринчи ҳолатдир. У давлат ОАВларида кўриниш беришидан аввал оддий шимолий кореяликалр ўз етакчиларининг бирорта ҳам фарзандини кўрмаган.

Жанубий Кореяда даъво қилишларича, Ким Чен Иннинг учта фарзанди бор. Тўнғичи фарзанди, катта эҳтимол билан, ўғил. Чжу Э унинг иккинчи фарзанди бўлиб, у тахминан ўн ёшда.

«Фотосуратлар пухталик билан ишлаб чиқилган дастурнинг бир қисми бўлиши керак, шу орқали шимолий кореяликларга Ким Чжу Э унинг давомчиси бўлишини кўрсатишяпти», — деди Жанубий Кореядаги Сежонг институтида Кимнинг оиласини анчадан буён ўрганиб келаётган тадқиқотчи Чон Сон Чан.

Кўпчилик таҳлилчилар шундай фикрга келдики, Ким Чен Ин ядро арсенали билан боғлиқ тадбирларга фарзандларидан бирини олиб бориш билан у шимолий кореяликларга, айниқса, ёшларга ўз оиласининг сулолавий бошқаруви ва ядро қуролининг ишлаб чиқилиши кейинги авлодда ҳам давом этишини эслатиб қўйган.

2016 йилда Жанубий Корея қочиб ўтган ва айни пайтда Сеулда депутатлик қилаётган КХДР собиқ дипломати Те Ён Хо журналистларга айтишича, КХДР қайсидир болага сажда қилишни бошлаганидан кейингина Ким Чен Ин ўзининг давомчисини танлаганидан дунё хабар топади, Кимнинг ўзи билан худди шундай ҳолат бўлган.