Britaniya razvedkasi Rossiya samolyotlarining Engels aerodromidan ko’chirilishi Ukrainaga zarba berishda qanday ta’sir qilishini prognoz qildi.
Razvedka ma’lumotiga ko‘ra, Rossiya uzoq masofaga uchuvchi Tu-95MS og‘ir bombardimonchi va Tu-22M3 o‘rta bombardimonchi samolyotlarini Rossiyaning Uzoq Sharqiga ko‘chirgan. Bunga Ukrainaning 5 va 26-dekabr kunlari Engels aviabazasiga zarba bergani va oqibatda uch harbiy halok bo‘lib, Rossiya samolyotlari shikastlangani sabab bo‘lgan.
“Rossiya uzoq masofalarga uchuvchi samolyotlarni Ukrainadan uzoqroqda joylashgan aerodromlarga tarqatib yuborish orqali aviazarbaga javob bergan bo‘lishi mumkin”, — deyiladi Britaniya Mudofaa vazirligi hisobotida.
Biroq Rossiya Ukrainaga qanotli raketalar bilan zarba berishda davom etishi, chunki qurollar 5 ming kilometr masofadagi obyektlarga tegishi mumkinligi aytilmoqda.
“Biroq aviatexnikani turli joydan boshqarish texnik xizmat ko‘rsatishda qo‘shimcha bosimga sabab bo‘ladi. Bu eski samolyotlarda cheklangan parvoz soatlarini yanada qisqartirishga olib keladi”, — deyiladi xabarda.
26-dekabrga o‘tar kechasi Rossiyaning Saratov viloyatidagi Engels harbiy aerodromida portlashlar sodir bo‘lgandi. Rossiya Mudofaa vazirligi ma’lumotiga ko‘ra, havo hujumidan mudofaa kuchlari aerodrom uzra Ukraina droni urib tushirgan, uning qismlari qulashidan uch nafar askar halok bo‘lgan.
Mavzuga doir: Aerodromga hujum Rossiyaning Ukrainaga zarba berishini qiyinlashtirishi mumkin — NYT
Izoh (0)