Ukraina Rossiya prezidenti Vladimir Putinning Rojdestvo bayrami sababli o‘t ochishni vaqtinchalik to‘xtatish haqidagi chaqirig‘iga javob qaytardi. Ukraina prezidenti devoni rahbari maslahatchisi Mixail Podolyak Rossiyaning bayonotlarini ikkiyuzlamachilik deb ta’rifladi.
Podolyak o‘zining Twitter’dagi sahifasida Putinning buyrug‘iga izoh berar ekan, Ukraina Rossiyadan farqli o‘laroq, begona hududga hujum qilmasligi va tinch aholini o‘ldirmasligini ta’kidladi.
“Birinchidan, Ukraina Rossiya kabi begona hududga hujum qilmaydi va tinch aholini o‘ldirmaydi. Ukraina o'z hududida faqat bosqinchi armiya a’zolarini yo‘q qiladi. Ikkinchidan, Rossiya bosib olingan hududlarni tark etishi kerak, shundan keyingina u ‘vaqtinchalik sulh’ni boshlaydi. Ikkiyuzlamachilikni o‘zingizga qoldiring”, — deyiladi munosabatda.
Ukraina Milliy xavfsizlik va mudofaa kengashi kotibi Aleksey Danilov ham sulh bo‘yicha o‘z fikrini bildirdi. U Rossiya bilan “Rojdestvo sulh”i bo‘yicha hech qanday muzokara olib borilmasligi, “tajovuzkor davlat” Ukraina hududini tark etishi kerakligini aytdi.
“Keling, amaliy tilda gaplashamiz. Rossiya bu sulhni kimga taklif qilmoqda? O‘zlariga? Oddiy yechim bor: ular chamadon va chiqindilarini olib, Rossiyaga ketishadi. Nuqta. Ular bilan hech qanday muzokara bo‘lmaydi. Rossiya sulhining bizga hech qanday aloqasi yo‘q”, — dedi Danilov.
Izoh (0)