АҚШ Украинага қаройб 3 миллиард долларлик ҳарбий ёрдам юбормоқчи, у бир неча ўнлаб Bradley пиёдалар зирҳли машиналарини ўз ичига олади. Бу ҳақда Associated Press АҚШ президенти маъмуриятидаги манбаларига таяниб хабар бермоқда.
Ҳабрий кўмак ҳажми жами 2,85 миллиард долларга тенг бўлади. АP қайд этишича, ушбу ёрдам пакети АҚШ шу пайтгача Киевга тақдим этганлари ичида энг йириги бўлади. Америка ҳукумати уни баҳор бошигача етказиб бермоқчи, чунки ўша пайтда жанговар ҳаракатлар яна фаол босқичга ўтиши кутилмоқда.
Янги ёрдам пакети ҳақида 6 январь, жума куни расман эълон қилиниши керак. Бошқа тафсилотлар ошкор этилмаяпти. 5 январь куни АҚШ президенти Жо Байден Украинага Bradley жанговар машиналари юборилишини эълон қилган, Германия канцлери Олаф Шольц эса Marder пиёдалар зирҳли машиналари ва Patriot мажмуаси батареяси (АҚШ томонидан аввалроқ тақдим этилган битта батареяга қўшимча равишда) етказилишини айтганди.
Россия томони Ғарб мамлакатлари томонидан Украинага қурол-яроғ етказилиаётганини танқид қилади. Кремль айтишича, бундай хатти-ҳаракатлар Москвага Украинада ўз мақсадларига эришишда халал бера олмайди, балки қуролли низони янада чўзиб юборади, холос.
Аввалроқ Байден октябрь ойида бошланган 2023-молия йили учун 1,7 триллион долларлик бюджет лойиҳасини имзолаганди. Ҳужжатга кўра, АҚШ мудофаа эҳтиёжлари учун 858 миллиард доллар ажратилади, Украина ва НАТОдаги иттифоқчилар қарийб 45 миллиард доллар миқдорида фавқулодда ёрдам олади. Ушбу маблағнинг қарийб 9 миллиард доллари Украина Қуролли кучларининг турли эҳтиёжлари, жумладан, ўқув машғулотлари, қурол-яроғлар, маошлар ва моддий-техник таъминот учун йўналтирилиши режалаштирилган.
Изоҳ (0)