Xitoyda koronavirus bilan kasallanganlar sonining keskin o‘sishi natijasida butun mamlakat bo‘ylab krematoriylar (murdalar kuydiriladigan maxsus joy) liq to‘lgan. Bu haqda Bloomberg Xitoy dafn etish tarmog‘i ishchilari va ekspertlarga tayanib xabar berdi.
Dekabr oyida kasallanish holatlari keskin ko‘payishi fonida Xitoy koronavirus bo‘yicha kundalik ma’lumotlarni e’lon qilishni to‘xtatdi. O‘limlar soni yanvarda 9 mingdan 25 mingtagacha o‘sib ketishi mumkin.
Pekin va Shanxaydagi krematoriylar ishchialri Bloomberg’ga ma’lum qilishicha, COVID-19 dan vafot etganlarning jasadlari kecha-yu kunduz kuydirilmoqda, krematsiya uchun eng yaqin oradagi bo‘sh joy sifatida esa faqat yanvar o‘rtalarini band qilish mumkin. Dafn qilish tarmog‘i ishchilaridan biri kasallanganlar sonining oshib ketishi tufayli “tizim ishdan chiqqani”ni aytdi.
Lunxuadagi krematoriylardan birida ma’lum qilishlaricha, har kuni u yerga 500 dan ortiq murda kelib tushadi. Bunday vaziyat sababli Xitoyda jasadlarni kuydirish bo‘yicha yashirin biznes yuzaga kelgan. Ilgarilari krematsiya bir necha ming yuan turgan bo‘lsa, yanvarda ba’zi krematoriylar uch kun ichidagi krematsiya uchun 68 ming yuan (9870 dollar), o‘lim yuz bergan kuni krematsiya qilish uchun esa 88 ming yuan (12 770 dollar) so‘ray boshlagan.
Avvalroq Yevroittifoq hukumati Xitoyga COVID-19 ning yangi to‘lqiniga qarshi kurashda yordam sifatida virusga qarshi bepul vaksinalarni yetkazib berishni taklif qilgan edi. Sog‘liqni saqlash masalalari bo‘yicha yevrokomissar Stella Kiriakides koronavirusning dunyo bo‘ylab qaytadan avj olishi ehtimoliga “yevropacha javob”ni ishlab chiqmoqchiligi aytilgandi.
25-dekabr kuni koronavirus bilan kasallanish darajasi keskin oshishi tufayli, Xitoy virus haqidagi kundalik ma’lumotlarni e’lon qilishni to‘xtatdi. Kasallanish holatlari Xitoy hukumatining koronavirus cheklovlariga qarshi noroziliklar fonida cheklov choralarini yumshatish haqidagi qaroridan keyin ko‘paydi. Avstraliya va Kanada Xitoydan kelgan sayyohlar uchun koronavirusga qarshi testni joriy qildi.
Izoh (0)