Хитой коронавирусга чалиниб касалхонага ётқизилганлар ва вафот этганлар сони ҳақида тўлиқ маълумот бермаяпти, деди Жаҳон соғлиқни сақлаш ташкилоти (ЖССТ) фавқулодда вазиятлар дастури ижрочи директори Майкл Райан. Унинг сўзлари Financial Times нашрида келтирилди.
«Биз Хитойда эълон қилинган жорий маълумотлар беморларнинг касалхонага ётқизилиши, интенсив терапия бўлимларига ётқизилиши, айниқса ўлим даражаси бўйича ҳақиқий таъсирини тўлиқ акс эттирмайди, деб ҳисоблаймиз», — деди Райан.
У Хитой раиси Си Цзиньпин «COVID-19 учун нол бардошлилик» сиёсатига чек қўйганидан кейин Пекинни пандемия кўлами ҳақида шаффофроқ бўлишга чақирди. «Нол бардошлилик» даврида Хитойда ҳар бир коронавирус эпидемияси локдаун ва қаттиқ чекловлар орқали бостирилганди.
Бироқ норозилик тўлқини бу сиёсатдан воз кечишга олиб келди ва инфекция тарқалишини тезлаштирди. Декабрь ойи охирида FT Хитой Касалликларни назорат қилиш ва олдини олиш маркази директори ўринбосари Сун Янгга таяниб, чекловлар бекор қилингандан кейин декабрнинг дастлабки 20 кунида 250 миллионга яқин одам ёки аҳолининг 18 фоизи коронавирус билан касалланганини ёзган эди. Пекиннинг 22 миллион аҳолисидан ярми инфекцияга чалинган, деб ёзади The Wall Street Journal.
Аммо 3 январда Хитой расман мамлакат бўйлаб атиги 5 258 та COVID-ўлим ҳақида хабар берди, жумладан 1 декабрдан бери 25 киши вафот этгани айтилди. Пекин COVID-19 ҳолатлари бўйича кундалик маълумотларни эълон қилишни тўхтатган.
Изоҳ (0)