Italiya bosh vaziri Jorja Meloni Rim Ukraina va Rossiya o‘rtasidagi tinchlik shartnomasiga kafil bo‘lishga tayyorligini aytdi. Shu munosabat bilan u Kiyevga 2023-yil 24-fevralgacha tashrif buyurmoqchi, deb yozadi “Kommersant”.
“Aniq ishlash zarur. Ikkala tomondan ham signallar bo‘lishi kerak. Bugungi kunda ahamiyatli signallar yo‘q, lekin Zelenskiy bilan suhbat chog‘ida uning bu yo‘nalishda tashabbuslarni ko‘rsatish niyati borligini eshitib xursand bo‘ldim. Italiya tinchlik jarayoniga kafil bo‘lishga tayyor, shuning uchun ham men 24-fevralgacha Kiyevga borib kelmoqchiman”, — dedi Italiya bosh vaziri yil yakunlari bo‘yicha matbuot anjumanida.
Avvalroq Zelenskiyning jamoasi tinchlikka erishish bo‘yicha reja tafsilotlarini ishlab chiqayotgani, takliflarni taxminan Ukrainada urush boshlanganiga bir yil to‘ladigan sanada, 24-fevral kuni taqdim etish ko‘zda tutilayotgani xabar berilgandi.
Noyabr o‘rtalarida Zelenskiy G20 sammitida videomurojaat bilan chiqib, o‘zining o‘nta shartdan iborat bo‘lgan “tinchlik formulasi”ni taklif etgan edi. Ushbu shartlar radiatsiyaviy va yadroviy xavfsizlik; oziq-ovqat xavfsizligi; energetika xavfsizligi; barcha asirlar va deportatsiya qilinganlarning ozod etilishi; BMT ustavining bajarilishi hamda Ukraina hududiy yaxlitligi va dunyo tartibining qayta tiklanishi; Rossiya qo‘shinlarining olib ketilishi va jangovar harakatlarning to‘xtatilishi; adolatning qaytarilishi; ekotsid (flora va faunaning yo‘q qilinishi)ga qarshi kurash; eskalatsiyaga yo‘l qo‘ymaslik; nizo yakunlanganining mustahkamlanishini o‘z ichiga oladi.
Ammo Rossiya hukumati Kiyev bilan Ukraina prezidenti Vladimir Zelenskiy tomonidan taklif qilingan “tinchlik formulasi” nizomlari asosida muloqot olib bormoqchi emas. Ukraina rahbariyatining tinchlik bo‘yicha rejasi konsepsiyasini Rossiya tashqi ishlar vaziri Sergey Lavrov xomxayol deb tavsifladi.
Avvalroq Zelenskiy Italiya Kiyevni qo‘llab-quvvatlashga qo‘shimcha 10 mln yevro ajratganini ma’lum qilgan edi.
Izoh (0)