Hindistonda “Dok-1 Maks” dorisini ishlab chiqargan zavod ustidan tekshiruvning dastlabki natijalari e’lon qilindi

Hindistonda Dori vositalari standartlarini nazorat qilish markaziy tashkiloti xodimlari, shuningdek, Uttar-Pradesh dori vositalari aylanmasini nazorat qiluvchi boshqarma mutaxassislari Noida shahrida joylashgan Marion Biotech zavodini tekshirishni yakunladi.

NDTV telekanali xabariga ko‘ra, tekshiruv 30-dekabrga o‘tar kechasi yakunlangan. Uning natijasida rasmiylar farmatsevtika kompaniyasi zavodida dori vositalari ishlab chiqarishni butunlay to‘xtatishni talab qilgan.

Telekanal xabariga ko‘ra, zavod mahsulotning sifat standartlariga muvofiq uzluksiz ishlab chiqarilishi va nazorat qilinishini ta’minlash nuqtayi nazaridan ishlab chiqarish amaliyoti talablaridan chetga chiqqani qayd etilgan.

Hindiston sog‘liqni saqlash vaziri Mansux Mandavia tekshiruv yakunlanganini tasdiqladi.

“Dok1 Max’ yo‘tal siropining tarkibi buzilgani haqidagi xabarlar tufayli o‘tkazilgan inspektorlar tekshiruvi yakunlandi va Marion Biotech kompaniyasining Noida shahridagi barcha ishlab chiqarish faoliyati kecha tunda to‘xtatildi. Tergov davom etmoqda”, — dedi u.

Hindistonning Marion Biotech Pvt.Ltd kompaniyasi tomonidan ishlab chiqarilgan “DOK-1 Maks” tabletkalari va siropi O‘zbekistonda 2012-yilda ro‘yxatga olingan va o‘sha yili sotuvga chiqarilgan.

Bugun, 30-dekabr kuni O‘zbekiston hukumati Marion Biotech kompaniyasining barcha dori vositalarini sotishni to‘xtatdi. Ular orasida “Sinepar”, “Nolgripp”, “Travamaks” va boshqalar bor.

Eslatib o‘tamiz, Hindistonda ishlab chiqarilgan “Dok-1 Maks” siropini iste’mol qilish ortidan hozircha Samarqandda 18 nafar, Toshkent va Qashqadaryoda bir nafardan, jami 20 nafar bola vafot etgani ma’lum qilingan.

Davlat xavfsizlik xizmati tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan.