Belarus qo‘shinlari zenitli raketa boshqarmasi boshlig‘i polkovnik Kirill Kazansev aytishicha, Mudofaa vazirligi mamlakat hududiga raketa bo‘laklari kelib tushishi sabablaridan biri sifatida Ukraina qurolli kuchlari tomonidan provokatsiya ko‘rib chiqilmoqda. Shu bilan birga, mudofaa idorasi hodisa raketa nosozligi tufayli yuz bergan bo‘lishi mumkinligini istisno qilmayapti.
“Biz ikkita versiyani ko‘rib chiqyapmiz: harbiylar yaxshi o‘qitilmagani tufayli yoki raketa nosozligi oqibatida zenitli boshqariluvchi raketa bexosdan uchirilgan yoki bo‘lmasa, bu Ukraina qurolli kuchlarining ataylab qilingan provokatsiyasi bo‘lgan”, — dedi Kazansev Belarus Mudofaa vazirligi Telegram-kanalida e’lon qilingan videoda.
Kecha, 29-dekabr kuni ertalab Belarusning Brest viloyati Ivanov tumani Gorbax qishlog‘i yaqiniga (u Ukraina chegarasidan 15 km masofada joylashgan) raketa kelib tushdi. Dastlabki ma’lumotlarga ko‘ra, bo‘laklar Ukraina hududidan uchirilgan C-300 zenitli boshqariluvchi raketaga tegishli. Belarus Ukrainadagi jangovar harakatlarda ishtirok etmayotgan, ammo hududiga raketa kelib tushgan uchinchi mamlakatga aylandi. Bundan avval shunga o‘xshash holatlar Polsha va Moldovada ham yuz bergandi.
Izoh (0)