Eron federatsiyasi jahon chempionatiga hijobsiz chiqqan shaxmatchi qizdan yuz o‘girdi
Eron shaxmat federatsiyasi Olmaotada tezkor shaxmat va blits bo‘yicha bo‘lib o‘tgan jahon chempionatida hijobsiz qatnashgan shaxmatchi qiz Sara Xademdan yuz o‘girdi. Bu haqda Arab News Eronning Islom inqilobi posbonlari korpusi nazorati ostidagi Fars axborot agentligiga tayanib xabar bermoqda.
“Xadem chempionatga Eron federatsiyasi orqali emas, balki mustaqil, o‘z hisobidan bordi. U bizning mamlakatimizga vakillik qilmaydi”, — degan islom respublikasi shaxmat federatsiyasi rahbari Hasan Taminiy.
Sara Xadem hijobsiz qatnashayotgani haqida avvalroq turnirda ishtirok etgan Reuters jurnalisti xabar bergandi. Ma’lumki, bu Eronning ayollar dress-kodi bo‘yicha qonunlariga ziddir.
1997-yilda tug‘ilgan Xadem jahon reytingida 804-o‘rinni, Eron bo‘yicha esa 10-o‘rinni egallaydi. 25—30-dekabr kunlari Olmaotada bo‘lib o‘tayotgan turnirda u rapid va blits bo‘yicha musobaqalar ishtirokchisi sifatida ro‘yxatdan o‘tgan.
Sky News telekanali xabariga ko‘ra, Olmaotadagi jahon chempionatiga yana bir eronlik shaxmatchi qiz — Atusa Purkashyan ham ro‘molsiz chiqqan.
Ikkala sportchi ham, katta ehtimol bilan, Eronda sentabr o‘rtalaridan buyon davom etayotgan norozilik namoyishlari bilan birdamlik belgisi sifatida o‘z hijozlarini yechgan.
Eronda 17-sentabrdan beri davom etayotgan namoyishlarda 400 000 ga yaqin odam hibsga olindi. Sentabr oyining oxirida Eronda 22 yoshli Mahsa Amini hijobni “noto‘g‘ri” o‘ragani uchun axloq politsiyasi tomonidan hibsga olinganidan keyin vafot etishi ortidan norozilik namoyishlari boshlandi. Ular butun mamlakat bo‘ylab haligacha davom etmoqda. Namoyishlar kuch tuzilmalari tomonidan shafqatsizlik bilan bostirilmoqda.
Tartibsizliklar chog‘ida xavfsizlik xodimlari tomonidan 450 dan ortiq odam o‘ldirilgan.
