Италия бош вазири Жоржа Мелони Рим Украина ва Россия ўртасидаги тинчлик шартномасига кафил бўлишга тайёрлигини айтди. Шу муносабат билан у Киевга 2023 йил 24 февралгача ташриф буюрмоқчи, деб ёзади «Коммерсантъ».
«Аниқ ишлаш зарур. Иккала томондан ҳам сигналлар бўлиши керак. Бугунги кунда аҳамиятли сигналлар йўқ, лекин Зеленский билан суҳбат чоғида унинг бу йўналишда ташаббусларни кўрсатиш нияти борлигини эшитиб хурсанд бўлдим. Италия тинчлик жараёнига кафил бўлишга тайёр, шунинг учун ҳам мен 24 февралгача Киевга бориб келмоқчиман», — деди Италия бош вазири йил якунлари бўйича матбуот анжуманида.
Аввалроқ Зеленскийнинг жамоаси тинчликка эришиш бўйича режа тафсилотларини ишлаб чиқаётгани, таклифларни тахминан Украинада уруш бошланганига бир йил тўладиган санада, 24 февраль куни тақдим этиш кўзда тутилаётгани хабар берилганди.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди. Ушбу шартлар радиациявий ва ядровий хавфсизлик; озиқ-овқат хавфсизлиги; энергетика хавфсизлиги; барча асирлар ва депортация қилинганларнинг озод этилиши; БМТ уставининг бажарилиши ҳамда Украина ҳудудий яхлитлиги ва дунё тартибининг қайта тикланиши; Россия қўшинларининг олиб кетилиши ва жанговар ҳаракатларнинг тўхтатилиши; адолатнинг қайтарилиши; экоцид (флора ва фаунанинг йўқ қилиниши)га қарши кураш; эскалацияга йўл қўймаслик; низо якунланганининг мустаҳкамланишини ўз ичига олади.
Аммо Россия ҳукумати Киев билан Украина президенти Владимир Зеленский томонидан таклиф қилинган «тинчлик формуласи» низомлари асосида мулоқот олиб бормоқчи эмас. Украина раҳбариятининг тинчлик бўйича режаси концепциясини Россия ташқи ишлар вазири Сергей Лавров хомхаёл деб тавсифлади.
Аввалроқ Зеленский Италия Киевни қўллаб-қувватлашга қўшимча 10 млн евро ажратганини маълум қилган эди.
Изоҳ (0)