Italiya yangi hukumat davrida G‘arbning zaif bo‘g‘ini bo‘lmaydi, aksincha Yevropa qadriyatlari va NATO tamoyillariga sodiq qoladi. Bu haqda ultrao‘ngchi “Italiya Birodarlari” partiyasi yetakchisi Jorj Meloni ma’lum qildi, deb yozadi Financial Times uning bayonotiga tayanib.
“Italiya boshini baland ko‘targan holda va to‘laqonli Yevropa va NATOning bir qismi. Bunga qo‘shilmagan odam hukumatning bir bo‘lagi bo‘la olmaydi — hatto bu hukumat tuzishdan bosh tortishni anglatsa ham”, — dedi siyosatchi. U Italiya yangi hukumat bilan G‘arb ittifoqining “zaif bo‘g‘ini” bo‘lmasligiga ishontirdi.
Melonining bayonoti mamlakat sobiq bosh vaziri, “Olg‘a Italiya” partiyasi yetakchisi Silvio Berluskoni Rossiya prezidenti Vladimir Putin bilan aloqalarni tiklaganini aytganidan keyin yangradi. Berluskonining aytishicha, u Putinni “tinchlikparvar va mulohazakor inson” sifatida biladi.
“Putin tug‘ilgan kunim uchun menga 20 shisha aroq va juda ta’sirli xat yubordi. Men unga ‘Lambrusko’ shishalari va xuddi shunday ta’sirli xat bilan javob berdim”, — degan siyosatchi.
Shundan so‘ng, muxolifatdagi Demokratik partiya yetakchisi Enriko Letta Berluskonining so‘zlari bo‘lajak hukumatga ishonchni susaytirishin aytdi. “Bugun Yevropada tug‘ilgan har qanday hukumat yo Putin tarafda yoki Ukraina va Yevropa Ittifoqi tarafda bo‘lishni tanlashi kerak”, dedi u.
“5 yulduz harakati” yetakchisi, sobiq bosh vazir Juzeppe Kontening fikricha, Berluskonining so‘zlari mamlakat obro‘siga putur yetkazgan.
Italiyada sentabr oxirida bo‘lib o‘tgan parlament saylovlarida Meloni partiyasi yetakchiligidagi koalitsiya g‘alaba qozongan edi. Jorjia Meloni Italiya bosh vaziri bo‘lishi kutilmoqda. U Italiya Vazirlar kengashini boshqaradigan birinchi ayol bo‘ladi.
Izoh (0)