Dunyo uchinchi jahon urushi yoqasida, dedi Polshaning sobiq prezidenti Aleksandr Kvasnevskiy. Bu haqda u Polsat News nashriga bergan intervyusida aytib o‘tdi.
Sobiq prezidentning so‘zlariga ko‘ra, Ukrainada urush boshlanganidan keyin “dunyo keskin o‘zgarib ketdi”. “Bu bir davrning oxiri va boshqa bir, noma’lum davrning boshlanishi bo‘ldi”, — dedi Kvasnevskiy.
“Hozir bir tomondan, Belarusni qo‘lida tutib turgan Rossiya, ikkinchi tomondan, AQSH prezidenti Jo Bayden boshchiligidagi birlashgan G‘arb”, — deya tushuntirdi u. — Bundan tashqari, Tayvanga da’vo qiladigan Xitoy ham bor”. Sobiq prezidentning so‘zlariga ko‘ra, Pekin Rossiyaning zaiflashishini kutmoqda, chunki zaif qo‘shni “ular uchun yaxshi yangilik”.
Bir so‘z bilan aytganda, dunyo “xavfli tartibsizlik davrida”, deb ta’kidladi Kvasnevskiy. “Bunga Serbiya va Kosovo chegarasidagi vaziyatni qo‘shsak, me’yoridan osongina oshib ketishi mumkin”, — deya ogohlantirdi u.
“Uchinchi jahon urushi boshlanishi haqida gapirayotganimizning o‘zi dahshatli”, — dedi Polshaning sobiq rahbari.
Kvasnevskiyning so‘zlariga ko‘ra, Ukraina Kreml shartlari bilan tinchlikni qabul qilmaydi, lekin Rossiya ham chekinmaydi. Rossiyani mag‘lub etish kerak, ammo “u baribir mavjudligicha qolaveradi”, shuning uchun “uning zaiflashishi mantiqan to‘g‘ri”, dedi siyosatchi. Uning fikricha, Bayden vaziyatni keskinlashtirmaslik uchun Ukrainaga ayrim turdagi qurollarni yetkazib berishdan bosh tortib, to‘g‘ri qaror qabul qilgan. “AQSH prezidenti har qanday holatda ham yangi jahon urushidan qochishni istaydi”, — deb ta’kidladi Polsha sobiq rahbari.
Izoh (0)