AQSH va yana 11 davlat tashqi ishlar vazirlari, shuningdek, Yevropa Ittifoqi tashqi xizmati rahbari Afg‘onistondagi “Tolibon” muvaqqat hukumatini ayollarning nohukumat tashkilotlarda ishlashini taqiqlash haqidagi qarorini bekor qilishga chaqirdi.
“Avstraliya, Buyuk Britaniya, Germaniya, Daniya, Italiya, Kanada, Niderlandiya, Norvegiya, AQSH, Fransiya, Shveysariya, Yaponiya tashqi ishlar vazirlari va Yevropa Ittifoqining tashqi siyosat bo‘yicha rahbari ‘Tolibon’ning ayollarning afg‘on va xalqaro nohukumat tashkilotlarda ishlashini taqiqlash haqidagi bemulohaza va xavfli buyrug‘i hayoti gumanitar yordamga bog‘liq bo‘lgan millionlab afg‘onlarni xavf ostiga qo‘yayotganidan chuqur xavotirda. Biz ‘Tolibon’ni bu qarorni zudlik bilan bekor qilishga chaqiramiz”, — deyiladi AQSH Davlat departamenti matbuot xizmati tomonidan e’lon qilingan qo‘shma bayonotda.
Bayonot mualliflariga ko‘ra, gumanitar yordam ko‘rsatish bilan bog‘liq ishlarda ayollar asosiy o‘rin tutadi. “Afg‘onistonga yordam yetkazish jarayonida ularning ishtirokisiz nodavlat notijorat tashkilotlar aholining eng zaif qatlamlarini oziq-ovqat, dori-darmon, qishga tayyorgarlik uchun zarur bo‘lgan buyumlar, yashashi uchun zarur bo‘lgan boshqa jihozlar va xizmatlar bilan ta’minlay olmaydi”, — deb ta’kidladi bayonot mualliflari.
Avvalroq Afg‘oniston muvaqqat hukumatidagi Iqtisodiyot vazirligi barcha milliy va xalqaro nohukumat tashkilotlarga ayollarni ishdan chetlashtirishni buyurgan edi. Shuningdek, vazirlik ushbu talabga rioya qilmagan tuzilmalarning litsenziyasini olib qo‘yish haqida ogohlantirgan. Shu fonda bir qancha xalqaro tashkilotlar muvaqqat hukumatdan tushuntirish olmaguncha o‘z dasturlarini to‘xtatib qo‘yishga qaror qildi.
“Tolibon” hukumati Oliy ta’lim vazirligi Afg‘onistondagi xususiy va davlat universitetlarida talaba qizlarning o‘qishini ham taqiqladi. Afg‘oniston oliy ta’lim vaziri Neda Muhammad Nadimning aytishicha, qizlarning dunyoviy universitetlarda tahsil olishi islom qonunlariga va an’analariga zid.
Izoh (0)