Amerika tomoni Ukraina qurolli kuchlariga Rossiya armiyasi dronlarni uchirayotgan joylarni nishonga olishda yordam bermoqda, deb yozadi The New York Times o‘z manbalariga tayanib.
Nashr xabarida aniqlik kiritilishicha, AQSH, shuningdek, Eronda jangovar dronlar ishlab chiqarilishiga ham to‘sqinlik qilishga intilmoqda, Amerika hukumati ma’lumotlariga ko‘ra, Rossiyaga qurol-yarog‘ aynan o‘sha yerdan yetkazib berilmoqda.
Nashr ma’lumotlariga qaraganda, Ukraina harbiylari dronlar uchirilayotgan nuqtalarni nishonga olishda qiynalmoqda, chunki rossiyalik harbiylar bu joylarni doim o‘zgartirib turadi. Shuningdek, gazeta G‘arb mamlakatlaridan birining yuqori mansabli harbiy amaldoriga tayanib yozishicha, Eron tomoni “Putinga yordam qilib” Rossiyaga Ukrainada foydalanish uchun uchuvchisiz uchar qurilmalar yetkazib berganidan keyin, Rossiya va Eron o‘rtasidagi sheriklik aloqalari chuqurlashgan.
G‘arb mamlakatlari Eronni Ukrainadagi harbiy nizoda qo‘llash uchun Rossiyaga uchuvchisiz uchar qurilmalar yetkazib berishda ayblamoqda. Eron va Rossiya buni rad etmoqda. Eron hukumati dronlar yetkazib berilganini tan olgandi, ammo, ularning so‘zlariga ko‘ra, qurol-yarog‘ harbiy harakatlar boshlanishidan oldin yuborilgan.
24-dekabr kuni Ukraina prezidenti ofisi rahbarining maslahatchisi Mixail Podolyak Eron Rossiyaga dronlar yetkazib berish hajmini oshirmoqchi ekanini ma’lum qildi. U Eronning dronlar ishlab chiqaruvchi zavodlarini yo‘q qilib, uchar qurilmalar yetkazib beruvchilarni hibsga olishga chaqirdi.
Avvalroq Eron Tashqi ishlar vazirligi Ukraina prezidenti Vladimir Zelenskiyning AQSH Kongressidagi nutqini tanqid qilgan edi. Tanqidga Zelenskiy Ukrainaga qarshi urushda foydalanish uchun Eron Rossiyaga dronlar yetkazib berayotgani haqida gapirgani sabab bo‘lgan. Shuningdek, Eron Ukrainani “tahdidli bayonotlar” oqibatlari haqida ogohlantirdi.
Izoh (0)