АҚШ ва яна 11 давлат ташқи ишлар вазирлари, шунингдек, Европа Иттифоқи ташқи хизмати раҳбари Афғонистондаги «Толибон» муваққат ҳукуматини аёлларнинг ноҳукумат ташкилотларда ишлашини тақиқлаш ҳақидаги қарорини бекор қилишга чақирди.
«Австралия, Буюк Британия, Германия, Дания, Италия, Канада, Нидерландия, Норвегия, АҚШ, Франция, Швейцария, Япония ташқи ишлар вазирлари ва Европа Иттифоқининг ташқи сиёсат бўйича раҳбари ‘Толибонънинг аёлларнинг афғон ва халқаро ноҳукумат ташкилотларда ишлашини тақиқлаш ҳақидаги бемулоҳаза ва хавфли буйруғи ҳаёти гуманитар ёрдамга боғлиқ бўлган миллионлаб афғонларни хавф остига қўяётганидан чуқур хавотирда. Биз ‘Толибонъни бу қарорни зудлик билан бекор қилишга чақирамиз», — дейилади АҚШ Давлат департаменти матбуот хизмати томонидан эълон қилинган қўшма баёнотда.
Баёнот муаллифларига кўра, гуманитар ёрдам кўрсатиш билан боғлиқ ишларда аёллар асосий ўрин тутади. «Афғонистонга ёрдам етказиш жараёнида уларнинг иштирокисиз нодавлат нотижорат ташкилотлар аҳолининг энг заиф қатламларини озиқ-овқат, дори-дармон, қишга тайёргарлик учун зарур бўлган буюмлар, яшаши учун зарур бўлган бошқа жиҳозлар ва хизматлар билан таъминлай олмайди», — деб таъкидлади баёнот муаллифлари.
Аввалроқ Афғонистон муваққат ҳукуматидаги Иқтисодиёт вазирлиги барча миллий ва халқаро ноҳукумат ташкилотларга аёлларни ишдан четлаштиришни буюрган эди. Шунингдек, вазирлик ушбу талабга риоя қилмаган тузилмаларнинг лицензиясини олиб қўйиш ҳақида огоҳлантирган. Шу фонда бир қанча халқаро ташкилотлар муваққат ҳукуматдан тушунтириш олмагунча ўз дастурларини тўхтатиб қўйишга қарор қилди.
«Толибон» ҳукумати Олий таълим вазирлиги Афғонистондаги хусусий ва давлат университетларида талаба қизларнинг ўқишини ҳам тақиқлади. Афғонистон олий таълим вазири Неда Муҳаммад Надимнинг айтишича, қизларнинг дунёвий университетларда таҳсил олиши ислом қонунларига ва анъаналарига зид.
Изоҳ (0)