Eron Tashqi ishlar vazirligi rasmiy vakili Nosir Qana’niy mamlakat Rossiya va Ukraina o‘rtasidagi nizoda ishtirok etmayotganini aytdi. Bu haqda Eron respublikasi axborot agentligi (IRNA) xabar bermoqda.
Uning so‘zlariga ko‘ra, harbiy nizo yuzasidan Eronga nisbatan har qanday organ tomonidan tahdidli bayonot uchun mas’uliyat Ukraina zimmasiga yuklanadi.
“Kimnidir, birovni, Eronni ayblash Ukrainaga, uning xalqiga, rahbariyatiga yordam bermaydi. Biz Ukraina rahbariyatining ayblovlarini rad etamiz. Yana bir marta ta’kidlayman: biz Ukrainadagi nizoda qatnashmayapmiz, biz inqirozni hal qilish va bu mamlakatda tinchlik o‘rnatilishiga yordam berishga tayyormiz… Qaysi organ tomonidan aytilayotgan bo‘lsa-da, tahdidli bayonotlarni mas’uliyatsizlik deb hisoblaymiz va bunday bayonotlarning huquqiy va siyosaiy oqibatlari uchun javobgarlikni Ukraina hukumati zimmasiga yuklaymiz”, — dedi Nosir Qana’niy.
G‘arb mamlakatlari Eronni Ukrainadagi harbiy nizoda qo‘llash uchun Rossiyaga uchuvchisiz uchar qurilmalar yetkazib berishda ayblamoqda. Eron va Rossiya buni rad etmoqda. Eron hukumati dronlar yetkazib berilganini tan olgandi, ammo, ularning so‘zlariga ko‘ra, qurol-yarog‘ harbiy harakatlar boshlanishidan oldin yuborilgan.
24-dekabr kuni Ukraina prezidenti ofisi rahbarining maslahatchisi Mixail Podolyak Eron Rossiyaga dronlar yetkazib berish hajmini oshirmoqchi ekanini ma’lum qildi. U Eronning dronlar ishlab chiqaruvchi zavodlarini yo‘q qilib, uchar qurilmalar yetkazib beruvchilarni hibsga olishga chaqirdi.
Avvalroq Eron Tashqi ishlar vazirligi Ukraina prezidenti Vladimir Zelenskiyning AQSH Kongressidagi nutqini tanqid qilgan edi. Tanqidga Zelenskiy Ukrainaga qarshi urushda foydalanish uchun Eron Rossiyaga dronlar yetkazib berayotgani haqida gapirgani sabab bo‘lgan.
Izoh (0)