Америка томони Украина қуролли кучларига Россия армияси дронларни учираётган жойларни нишонга олишда ёрдам бермоқда, деб ёзади The New York Times ўз манбаларига таяниб.
Нашр хабарида аниқлик киритилишича, АҚШ, шунингдек, Эронда жанговар дронлар ишлаб чиқарилишига ҳам тўсқинлик қилишга интилмоқда, Америка ҳукумати маълумотларига кўра, Россияга қурол-яроғ айнан ўша ердан етказиб берилмоқда.
Нашр маълумотларига қараганда, Украина ҳарбийлари дронлар учирилаётган нуқталарни нишонга олишда қийналмоқда, чунки россиялик ҳарбийлар бу жойларни доим ўзгартириб туради. Шунингдек, газета Ғарб мамлакатларидан бирининг юқори мансабли ҳарбий амалдорига таяниб ёзишича, Эрон томони «Путинга ёрдам қилиб» Россияга Украинада фойдаланиш учун учувчисиз учар қурилмалар етказиб берганидан кейин, Россия ва Эрон ўртасидаги шериклик алоқалари чуқурлашган.
Ғарб мамлакатлари Эронни Украинадаги ҳарбий низода қўллаш учун Россияга учувчисиз учар қурилмалар етказиб беришда айбламоқда. Эрон ва Россия буни рад этмоқда. Эрон ҳукумати дронлар етказиб берилганини тан олганди, аммо, уларнинг сўзларига кўра, қурол-яроғ ҳарбий ҳаракатлар бошланишидан олдин юборилган.
24 декабрь куни Украина президенти офиси раҳбарининг маслаҳатчиси Михаил Подоляк Эрон Россияга дронлар етказиб бериш ҳажмини оширмоқчи эканини маълум қилди. У Эроннинг дронлар ишлаб чиқарувчи заводларини йўқ қилиб, учар қурилмалар етказиб берувчиларни ҳибсга олишга чақирди.
Аввалроқ Эрон Ташқи ишлар вазирлиги Украина президенти Владимир Зеленскийнинг АҚШ Конгрессидаги нутқини танқид қилган эди. Танқидга Зеленский Украинага қарши урушда фойдаланиш учун Эрон Россияга дронлар етказиб бераётгани ҳақида гапиргани сабаб бўлган. Шунингдек, Эрон Украинани «таҳдидли баёнотлар» оқибатлари ҳақида огоҳлантирди.
Изоҳ (0)