“Sabrimiz cheksiz emas” — Eron Zelenskiyni ogohlantirdi

Eron Tashqi ishlar vazirligi Ukraina prezidenti Vladimir Zelenskiyning AQSH Kongressidagi nutqini tanqid qildi. Bu  haqda Times of Israel xabar berdi.

Tanqidga Zelenskiy Ukrainaga qarshi urushda foydalanish uchun Eron Rossiyaga dronlar yetkazib berayotgani haqida gapirgani sabab bo‘lgan.

“Genotsid siyosatida Rossiya o‘ziga ittifoqchi topdi: Eron. Rossiyaga yuborilgan yuzlab  Eron dronlari bizning muhim infratuzilmamiz uchun tahdidga aylandi. Shu tariqa bir terrorchi ikkinchisini topdi. Agar biz ularni hozir to‘xtatmasak, boshqa ittifoqchilaringizga zarba berishlari vaqt masalasi. Biz buni qilishimiz kerak”, — degan Zelenskiy o‘z nutqida.

Eron TIV Zelenskiyning “Eron Islom Respublikasiga nisbatan takroriy ayblovlari va qo‘pol so‘zlari”ni qoralab bayonot berdi. Unda “Eron Ukrainadagi urushda foydalanish uchun hech bir tomonga harbiy texnika yetkazib bermagani” ta’kidlanadi.

Vazirlik doim barcha mamlakatlar, jumladan, Ukrainaning hududiy yaxlitligini hurmat qilganini bildirib, “Zelenskiy Eronning bu kabi asossiz ayblovlarga nisbatan strategik sabri cheksiz emasligini bilishini” qayd etdi.

Sentabr oyida Ukraina Eronda ishlab chiqarilgan uchuvchisiz uchoqlardan foydalangan holda Rossiya hujumlar qilganini xabar bergan. Eron tashqi ishlar vaziri Husayn Amir-Abdullohiyyan Rossiyaga uchuvchisiz samolyotlar yuborilganini tan olib, yetkazib berish urush boshlanishidan oldin amalga oshirilganini aytgan. Bundan oldin Eron rasmiylari Rossiyaga uchuvchisiz samolyotlar yuborilganini rad etgandi.