Ukraina prezidenti Vladimir Zelenskiy Oliy radaga an’anaviy murojaat bilan chiqdi, uning nutqidan olingan parchalarni Ukraina OAVlari keltirib o‘tmoqda. Xalq deputati Yaroslav Jeleznyak aniqlik kiritishicha, 28-dekabr kuni butun mamlakat hududida e’lon qilingan havo trevogasi tufayli, tadbir bir yarim soatga kechiktirilgan.
52 daqiqa davom etgan nutqi chog‘ida Ukraina prezidenti Rossiya bilan harbiy nizodan yakuniy maqsad — Ukraina hududiy yaxlitligini qayta tiklash va asirga tushganlarni ozod etish ekanini aytdi.
“Shu yilning to‘qqiz oyini biz G‘arbga o‘zini topib, global maydonga qaytishda yordam berishga sarfladik. Yevropaga butun erkin dunyo bilan birgalikda g‘alaba uchun kurashayotgan bitta kuchli jamoa sifatida his etishida ko‘maklashdik. Aynan Ukraina Yevropa Ittifoqini birlashtirdi”, — dedi Ukraina prezidenti “Ichki va tashqi siyosat asoslari to‘g‘risida”gi murojaatida.
Zelenskiyning so‘zlariga ko‘ra, Ukrainaning Yevroittifoqqa qo‘shilishi haqida muzokaralarni boshlash vaqti kelmoqda.
Vladimir Zelenskiy Yevroittifoqqa qo‘shilish haqida 28-fevral kuni ariza bergandi. 23-iyun kuni Ukraina Yevroittifoqqa a’zolikka nomzod maqomini qo‘lga kiritdi. 21-noyabr kuni Ukraina prezidenti yana bir marta G‘arb mamlakatlarini Kiyevning NATO va Yevroittifoqqa qo‘shilish haqidagi so‘rovini qo‘llab-quvvatlashga chaqirdi.
1-iyul kuni Yevrokomissiya rahbari Ursula fon der Lyayyen Yevroittifoqqa a’zo bo‘lish uchun Ukraina bir qator aksilkorrupsiyaviy va sud islohotlarini o‘tkazishi kerakligini aytdi. 21-noyabr kuni Zelenskiy Yevroittifoqqa kirish uchun asosiy talablardan birini bajarib, siyosatchilar ustidan umrbod moliyaviy monitoringni bekor qildi.
Izoh (0)