Rossiya tomoni o‘z elchisi Aleksey Borodavkinning Qozog‘istondagi “millatchilar va rusofobiya” haqida shov-shuvga sabab bo‘lgan bayonoti yuzasidan uzr so‘radi. Bu haqda Qozog‘iston Tashqi ishlar vazirligi rasmiy vakili Oybek Smadiyorov ma’lum qildi, deb yozadi Asia Plus.
“Aleksey Borodavkin bilan tegishlicha suhbatlar olib borildi. Bundan tashqari, Majilis spikeri Yerlan Koshanov Rossiya elchisining bayonotlari yuzasidan izoh berdi. Shuningdek, Rossiya tashqi ishlar vaziri Sergey Lavrov ham bu masalada tushuntirish berdi. Bu masala bugungi kunda o‘z yakunini topdi, deb hisoblaymiz. Rossiya tomonining uzrini qabul qildik”, — dedi u.
TIV vakili ta’kidlashicha, Qozog‘iston va Rossiya o‘rtasidagi munosabatlar davlat rahbari tomonidan belgilanadi. Prezident Qosim-Jo‘mart To‘qayevning Rossiyaga so‘nggi tashrifi chog‘ida tomonlar diplomatik aloqalar o‘rnatilganiga 30 yil to‘lishi munosabati bilan deklaratsiya imzolagan edi.
“Bizning prezidentimiz qayd etganidek, bu vaqt ichida davlatlarimiz do‘stlik va ahil qo‘shnichilikning mustahkam rishtalariga asoslangan o‘zaro manfaatli strategik sheriklikni qurishga muvaffaq bo‘ldi. Mamlakatlarimiz o‘rtasida o‘zaro ishonchga asoslangan konstruktiv muloqot yo‘lga qo‘yilgan, hamkorlikning yuqori darajasiga erishilgan. O‘rtamizda qizg‘in masalalar yo‘q”, — deya xulosa qildi Smadiyorov.
Shov-shuv Borodavkinning dekabrdagi intervyusidan keyin yuzaga kelgandi, o‘shanda u shunday degandi: “Afsuski, millatchilik tendensiyalarini tasdiqlay olaman va bu borada xavotir bildiraman. Qozog‘istonda radikal, ta’kidlab aytaman, millatchilik tendensiyalari tobora yaqqolroq namoyon bo‘lmoqda”. Shuningdek, elchi “agar Rossiyadan bu haqda iltimos qilishsa”, u Qozog‘istonga ekstremizm va millatchilikni yo‘q qilishda yordam berishga tayyorligini aytgandi.
Uning bu bayonotini izohlar ekan, Majilis spikeri Yerlan Koshanov Borodavkin — juda tajribali diplomat ekanini va “propagandachilar va siyosatshunoslarga tenglashmasligi kerakligini” aytdi.
O‘z navbatida, Rossiya tashqi ishlar vaziri Sergey Lavrov elchining gaplari Rossiya TIV pozitsiyasini anglatmasligini, ustiga-ustak, u “Aleksey Nikolayevich Borodavkinning ham pozitsiyasini aks ettirmasligini, chunki u Qozog‘iston OAVlari da’vo qilayotgan bayonotni u hech qachon bermaganini” aytdi. Lavrov qayd etishicha, Rossiya TIV mamlakatlar o‘rtasidagi munosabatlar “faqat prezidentlar tomonidan belgilanishi”dan kelib chiqadi.
Izoh (0)