Bill Geyts: “Nevaralarimiz qo‘rqinchli dunyoda katta bo‘lishi mumkin”

Amerikalik milliarder Bill Geyts iqlim o‘zgarishiga qarshi kurash uchun texnologiyalarni faol ravishda moliyalashtirish zarurligini, aks holda keyingi avlod hozirgidan ancha yomonroq dunyoda o‘sib-ulg‘ayishini aytdi. Bu haqda CNBC telekanali xabar bermoqda.

“Yaqinda to‘ng‘ich qizim kelasi yil katta ota bo‘lishim haqidagi yangilikni aytganidan keyin, dunyoga boshqacha ko‘z bilan qaray boshladim. Endi men kelajak avlodga omon qolish va gullab-yashnash imkoniyatiga ega bo‘lishi uchun yordam berishni har qachongidan ko‘ra ko‘proq xohlayman”, — deb yozdi milliarder o‘z blogida.

Geytsning fikricha, 2050-yilga qadar insoniyat global darajada issiqxona gazlari ajralib chiqishini bartaraf etishi kerak.

“Ekstremal ob-havo sharoitlari allaqachon ko‘p azob-uqubatlarni yetkazmoqda, agar biz ajralmalarni nol darajagacha tushirmasak, nevaralarimiz hozirgidan ancha yomonroq dunyoda yashaydi”, — dedi Microsoft asoschilaridan biri.

“Karbonat angidrid ajralib chiqishini nol darajagacha tushirish insoniyat uchun eng murakkab maqsadga aylanadi. Biz butun iqtisodiyotni tubdan o‘zgartirishimiz kerak, ya’ni ishlarni bajarish, harakatlanish, elektr ishlab chiqarish, oziq-ovqat yetishtirish, issiqlik va salqinlikni saqlash tarzimizni yaxshilashimiz kerak va buni 30 yildan kamroq vaqt ichida amalga oshirishimiz kerak”, — deb yozdi Geyts.

Milliarderning so‘zlariga ko‘ra, yaxshi yangilik shundan iboratki, iqlim texnologiyalariga investitsiyalar u kutganidan ziyod bo‘lgan, yomon yangilik esa — issiqxona gazlari ajralib chiqishi o‘sib borayotganidir.

2021-yilda Bill Geyts yaqin besh yil ichida iqlim o‘zgarishiga qarshi kurashish loyihasi uchun 2 milliard dollar investitsiya kiritishi ma’lum qilingan edi. Geytsning fikriga ko‘ra, jahon sanoati atom energiyasidan voz kechmasligi kerak, chunki quyosh va shamol kabi muqobil energiya manbalari global elektr energiyasiga bo‘lgan ehtiyojni qondirish uchun yetarli emas. Shuningdek, Geytsning atmosferadan karbonat angidrid gazini filtrlab olish texnologiyasidan umidi katta.