“Dunyoning eng boy odamlari ro‘yxatini tark etaman”. Bill Geyts butun boyligini xayriyaga bermoqchiligini ma’lum qildi

Microsoft asoschisi Bill Geyts o‘zining deyarli barcha boyligini sobiq rafiqasi Melinda bilan hamkorlikda tashkil etgan xayriya fondiga berishini ma’lum qildi.

“Men boyligimning deyarli barchasini fondga berishni rejalashtirganman. Men pastga tushaman va oxir-oqibat dunyoning eng boy odamlari ro‘yxatini tark etaman”, — deb yozdi Geyts Twitter’da.

So‘nggi bir necha yil ichida deb yozadi Microsoft asoschisi dunyo bir nechta dahshatli zarbalarni boshdan kechirdi, jumladan, koronavirus pandemiyasi va Ukrainadagi urush “ko‘plab odamlarni umidsizlikka soldi, dunyo bundan ham battar holga tushishi mumkinmi?”

“Ammo men optimistman”, — deb tan oldi Geyts, u “zararni yumshatish va dunyo erishayotgan taraqqiyotga qaytish mumkinligiga ishonishini” qo‘shimcha qildi.

Geytsning eslashicha, 2000-yilda u rafiqasi bilan xayriya ishlariga yiliga 6 milliard dollar ajratadigan fond tashkil qilgan. “Biroq zamonimizning buyuk inqirozlari barchamizdan yanada ko‘prog‘ini talab qiladi”, — deb yozgan Geyts va endi fond xayriya ishlariga har yili 9 milliard dollar ajratishini qo‘shimcha qildi. Buning uchun Microsoft asoschisi fondga 20 milliard dollar taqdim etmoqchi.

“Men o‘z resurslarimni jamiyatga azob-uqubatlarni kamaytirish va hayotni yaxshilashga eng katta ta’sir ko‘rsatadigan usullar bilan qaytarishga majburman. Va umid qilamanki, juda boy va imtiyozli lavozimdagi boshqa odamlar ham shu daqiqada oldinga qadam tashlaydi”, — dedi Geyts.

Fond Bill va Melinda Geytslarning nomi bilan atalsa-da, Microsoft asoschisining ta’kidlashicha, unga mablag‘larining yarmi investor Uorren Baffet tomonidan taqdim etilgan. “Men uning do‘stligi va yetakchiligini qanchalik qadrlashimni hech qachon yetarli darajada ifoda eta olmayman”, — deb yozgan Geyts.

Bloomberg Geytsning boyligini 114 milliard dollarga baholaydi va uni dunyodagi to‘rtinchi eng boy odam, deb hisoblaydi. Forbes’ning real vaqt rejimida yangilanadigan dunyodagi eng badavlat biznesmenlari reytingida Geytsning boyligi 13-iyul oqshomida 122,1 milliard dollarga baholangan, ushbu reytingda ham Geyts to‘rtinchi o‘rinni egallagan.