2022-yilda dunyoning eng badavlat milliarderlari 1,9 trillion dollar yo‘qotgan. Bu haqda Forbes xabar bermoqda.
9-dekabr holatiga ko‘ra, dunyo milliarderlarining umumiy boyligi 13,8 trillion dollardan 11,9 trillion dollarga tushgan. Forbes ma’lumotlariga ko‘ra, joriy yilda milliarderlar soni ham 2 671 tadan 2 523 taga kamaygan.
2022-yil davomida FTX kriptobirjasi asoschisi Sem Bankmen-Frid va repper Kanye Uest kabi bir qancha mashhur shaxslar esa milliarderlar safini tark etdi.
Joriy yilda umumiy hisobda 1 trillion dollar yo‘qotgan 300 nafar texnologik milliarderlar eng ko‘p zarar ko‘rdi. Ular uchun pandemiyadagi kompaniya va startaplar aksiyalarining keskin oshishidan keyin vaziyat beqaror bo‘lib bormoqda.
Bunday vaziyatda dunyo bo‘ylab ko‘plab kompaniyalar ishchilarni bo‘shatish orqali xarajatlarni qisqartirmoqda.
Amazon aksiyalari yil davomida deyarli 50 foizga tushib ketdi. Google’ning bosh kompaniyasi Alphabet aksiyalari 36 foizga tushgani oqibatida kompaniya asoschilari Larri Peyj va Sergey Brin 40 milliard dollar yo‘qotdi.
Texnologik gigant — Microsoft aksiyalari ham dekabr holatiga ko‘ra 27 foizga arzonlashgan, bu uning asoshisi Bill Geyts va sobiq bosh direktor Stiv Balmerning sof boyligini pasaytirdi.
Facebook va Instagram bosh kompaniyasi — Meta’ga egalik qiluvchi Mark Sukerberg esa joriy yilda taxminan 78 milliard dollar yo‘qotdi. Bunga Meta aksiyalari 66 foizga arzonlashgani sabab bo‘ldi.
2022-yilda eng ko‘p boylik yo‘qotgan inson esa Ilon Mask bo‘ldi. Mask boyligining asosiy qismi elektromobil ishlab chiqaruvchi Tesla kompaniyasi hissasiga to‘g‘ri keladi. Kompaniya aksiyalari esa yil boshidan ber 60 foizga pasaydi va bu 2022-yilda Maskning 115 milliard dollar yo‘qotishiga olib keldi.
Joriy yil avvallida Ilon Mask dunyoning eng boy odamlari reytingida Bernard Arnoni 70 milliard dollarga ortda qoldirayotgan edi. Dekabr boshida Tesla kompaniyasi asoschisi Arnoga birinchi o‘rinni boy berdi. Maskning boyligi pasayishda davom etmoqda.
2022-yil davomida amerikalik milliarderlar eng ko‘p zarar ko‘rdi — 660 milliard dollar. Xitoylik milliarderlar 620 milliard dollar yo‘qotgan bo‘lsa, sanksiyalar oqibatida rossiyalik milliarderlarning umumiy boyligi ham 150 milliard dollarga kamaygan.
Biroq 2022-yil hamma uchun ham yomon bo‘lmadi. Investitsiya va sport magnati Todd Boeli va modelyer Tom Ford bu yil milliarderlar qatoriga qo‘shildi.
Hindistonlik milliarder Gautam Adani esa 2022-yilda qo‘shimcha 55,1 milliard dollar ishlab topdi. U elektr energiyasi, yashil energiya va ko‘chmas mulk konglomerati Adani Group’ga egalik qiladi.
Mavzuga doir: Ilon Mask joriy yilda 2021-yilda topgan boyligidan ko‘ra ko‘proq mablag‘ yo‘qotdi — Bloomberg
Izoh (0)