Bill va Melinda Geytsning fondi Afg‘onistonda poliomiyelitga qarshi kurashish uchun “Tolibon” muvaqqat hukumati bilan hamkorlik qilmoqda. Ular bilan birga ishlayotgani haqida amerikalik biznesmen The Daily Telegraph nashriga bergan intervyusida ma’lum qildi.
Geyts aytishicha, uning fondi sheriklari Qatarda “Tolibon” bilan uchrashuv o‘tkazgan. Tadbirkor boshqa tafsilotlarni oshkor qilib o‘tirmadi, biroq toliblarga nisbatan AQSH tomonidan kiritilgan sanksiyalar tufayli bu ish juda qiyin bo‘layotganini aytdi. Shuningdek, Geyts toliblar bilan shaxsan uchrashishga tayyorligi yuzasigan berilgan savolga aniq javob qaytarmadi.
“Ochig‘ini aytsam, bu mavzu maxfiy xususiyatga egami, yo‘qmi — bilmayman. Poliomiyelit bo‘yicha kampaniyaga yordam berish uchun ko‘p narsa qilgan bo‘lardim. Bu fondning birlamchi vazifasi”, — dedi biznesmen.
U dunyoda poliomiyelitga qarshi kurashga yana 1,2 milliard dollar yo‘naltirishini ma’lum qildi. 2007-yildan buyon Bill Va Melinda Geyts fondi bu maqsadga besh milliard dollar sarflagan.
Afg‘onistonda poliomiyelit bilan bog‘liq vaziyat keskin bo‘lib, bunga sabab mamlakatda shifokorlar va dori-darmonlar yetishmasligidir. AQSH kasalliklar nazorati va profilaktikasi markazlari ma’lumotlariga ko‘ra, uch million nafar afg‘on bolalarida poliomiyelitga qarshi vaksina olish imkoniyati yo‘q.
Izoh (0)