Rossiya kosmik agentligi Xalqaro koinot stansiyasiga bo‘sh fazo kemasini yuborish imkoniyatini ko‘rib chiqmoqda. Bu haqda “Phys.org” xabar berdi.
O‘tgan hafta Rossiyaning “Soyuz MS-22” kosmik kemasida sovituvchi suyuqlik sizib chiqishi kuzatildi, bu esa kema ishidagi buzilishlarga olib keldi. Ekspertlar haligacha avariyaning aniq sabablarini va uning ehtimoliy oqibatlarini o‘rganmoqda, biroq “Roskosmos” allaqachon XKSdagi kosmonavtlarni “qutqarish” rejasini ko‘rib chiqmoqda.
“Roskosmos” va NASA vakillari ma’lum qilishicha, ushbu avariya koinot stansiyasi faoliyatiga va uning bortidagi fazogirlar hayotiga xavf tug‘dirmaydi. Ayni vaqtda esa hodisa oqibatida “Soyuz” kemasi ichkarisida harorat sezilarli darajada oshgani, bu esa uning ishdan chiqishiga olib kelishi mumkinligi haqida xabarlar paydo bo‘ldi. Bu kema esa kosmonavtlar uchun transport vositasi bo‘lib hisoblanadi, xususan, u sentabrda ikki rossiyalik va bir amerikalikni orbitaga olib chiqqan edi. Kelasi yil martida esa bu kema ularni Yerga qaytarib olib kelishi kerak.
Rossiya kosmik agentligi vakili Sergey Krikalyovning aytishicha, fazogirlar Yerga qanday qaytib kelishi yuzasidan yakuniy qaror qabul qilinganicha yo‘q. Ushbu bosqichda ikkita variant ko‘rib chiqilmoqda: orbitaga boshqa “Soyuz” kosmik kemasi uchiriladi — buning ehtimoli katta yoki bo‘lmasa kosmonavtlar “jabrlangan” kemada uyga qaytadi, bu ssenariy esa ehtimoldan uzoqroq.
Ayni paytda XKSda yetti kishi bo‘lib, stansiyaga biriktirilgan Crew Dragon kosmik kemasi faqat to‘rt kosmonavtni sig‘dira oladi. Ya’ni, agar shoshilinch evakuatsiya zarurati yuzaga kelsa, hammani qutqarish iloji bo‘lmaydi. Bu kosmik kema oktabrda ikki amerikalik, bir yaponiyalik va bir rossiyalikni XKSga yetkazgandi.
NASA’dan Joel Montalbano ma’lum qilishicha, “Soyuz” kosmik kemasiga yetgan zarar sababi haligacha tushunarsiz bo‘lib qolmoqda. Ayni paytda uchta versiya ko‘rib chiqilmoqda, ya’ni mikrometeorit, kosmik chiqindi yoki kosmik kema tizimining ishdan chiqishi sabab bo‘lgan bo‘lishi mumkin.
Shu bilan birga, “Roskosmos” rahbari Yuriy Borisov ma’lum qilishicha, “Soyuz” bortidagi harorat barqarorlashgan va Selsiy bo‘yicha 30 darajadan oshmayapti. Bu kemaga XKSnign Rossiya segmentidan sovuq havoli quvur ulanganidan keyin yuz bergan.
Izoh (0)