Butun dunyodan milliarderlar Rojdestvo va Yangi yil bayramlari arafasida Karib orollariga keldi, natijada bu hududdagi yaxtalar soni o‘tgan oyga nisbatan ikki barobardan ko‘proqqa ortdi. Bu haqda Bloomberg xabar bermoqda.
Agentlik hisob-kitoblariga ko‘ra, noyabr oxirida orollar yaqinida 81 ta yaxta bo‘lgan, hozir esa Karib havzasidagi mamlakatlarda 200 dan ortiq yaxtalar to‘plangan.
U yerdagi yaxtalarning eng yirigi — amerikalik biznesmen va Geffen Records ovoz yozish studiyasi asoschisi Devid Geffenning (Forbes uning boyligini 7,7 milliard dollarga baholamoqda) Sen-Bartda langar tashlab turgan 138 metrli Rising Sun superyaxtasi.
Undan keyingi o‘rinda — Britaniyaning Virginiya orollari yaqinidagi 117 metrli Infinity yaxtasi. Agentlik uning egasi kimligiga aniqlik kiritmagan, biroq ba’zi ma’lumotlarga ko‘ra, u amerikalik milliarder, Harbour Freight do‘konlar tarmog‘i direktori Erik Shmidtga tegishli, uning boyligi esa 9,5 milliard dollarni tashkil etadi.
Eng yirik yaxtalardan yana biri — Kanada va yamaykalik tadbirkor, Portland Holdings investitsiya kompaniyasi rahbari Maykl Li-Chinning 115 metrli Ahpo yaxtasi. Forbes ma’lumotlariga ko‘ra, uning boyligi 1,5 milliard dollarga teng bo‘lib, u hozirda Sent-Kitsda bo‘lib turibdi.
Bayramlar arafasida dunyoning boshqa burchagi — Maldiv orollarida ham yaxtalar keskin ko‘paygan. U yerga yetib borgan 17 ta kema orasida eng yirigi — 88 metrli Lauren L bo‘lib, u ukrainalik biznesmen Igor Kolomoyskiyga tegishli deb aytilmoqda.
Forbes yozishicha, bu yil Gustaviya portida (Karib dengizidagi Fransiyaning dengizorti hududi Sen-Bart poytaxti) bayramlar mavsumi avvalgidek gavjum emas, chunki u yerda rossiyalik oligarxlarning superyaxtalari yetishmayapti. Masalan, biznesmen Roman Abramovichga tegishliligi aytiladigan 168 metrli Eclipse superyaxtasi yoki Magnitogorsk metallurgiya kombinati direktorlar kengashi raisi Viktor Rashnikovga aloqador bo‘lgan 139 metrli Ocean Victory an’anaga zid ravishda bu yil bayram arafasida orolga kelmadi. Ularning ikkalasi ham Yevroittifoq va AQSH sanksiyalariga uchragan.
Izoh (0)