Ukrainadagi urushda ikki nafar tojikistonlik halok bo‘ldi. Ular Rossiya koloniyalarida jazo o‘tayotgan edi

Rossiyaning Ukraina bilan urushida tojikistonliklar halok bo‘ldi, deb xabar bermoqda Asia Plus. Ular Rossiya koloniyalarida jazo muddatini o‘tayotgan edi.

O‘tgan o‘n kun ichida Tojikistonning Xatlon viloyatida Ukrainadagi urushda halok bo‘lgan ikki kishining dafn marosimi bo‘lib o‘tgan. Qarindoshlarining so‘zlariga ko‘ra, ular Rossiya koloniyalarida jazo muddatini o‘tayotgan edi, ammo Ukraina hududidagi janglar zonasiga borib qolgan. Gap 22 yoshli Boboaziz To‘ydiyev va 28 yoshli Manuchehr Shodov haqida bormoqda.

To‘ydiyevning oila a’zolari aytishicha, u Rossiyada 2021-yil sentabrida narkotiklar saqlash ayblovi bilan qo‘lga olingan va olti yillik qamoqqa hukm qilingan.

Shodov aynan qanday ayblov bilan qamalgani borasida tafsilotlar yo‘q. Do‘stlari aytishicha, u Sankt-Peterburgdagi qamoqxonada saqlangan.

Ikki yil avvalgi ma’lumotlarga ko‘ra, Rossiya tergov izolyatorlari va qamoqxonalarida qariyb 10 ming nafar Tojiksiton fuqarolari bo‘lgan.

Avvalroq Ukraina qurolli kuchlari bosh shtabi rasmiysi, brigada generali Aleksey Gromov Rossiya o‘z yo‘qotishlarini O‘zbekiston va Tojikistondan kelgan mehnat muhojirlari hisobiga to‘ldirayotganini aytgandi.

Shuningdek, Rossiya koloniyalaridagi mahbuslar 2 oy ichida rekord darajada kamayib ketgani, bu ular urushga yollanayotgani bilan bog‘liq bo‘lishi mumkinligi xabar berilgan edi.

Ukraina Qurolli kuchlari Maxsus operatsiya kuchlari qoshidagi Milliy qarshilik markazi ma’lumotlariga ko‘ra, Rossiya Ukrainadagi maxsus operatsiyasiga qamoqxonalarda Vagner xususiy harbiy kompaniyasi tomonidan yollangan o‘n minglab askarlarni jo‘natmoqda. Shu paytgacha ular jami 23 ming nafar mahbusni yollagan.